თამარ ბაჩალიაშვილის დედა, თეონა თამაზაშვილი აცხადებს, რომ თუ გამოძიებაში FBI არ ჩაერთვება, აშშ-ს საელჩოს წინ შიმშილობას დაიწყებს.

"ველოდები სამი დღის მანძილზე. გაგზავნილია წერილი ოფიციალურად, თუ არ მოხდება FBI-ს ჩართულობა ვაცხადებ, დედა დავჯდებ აქ და დავიწყებ შიმშილობას", — აღნიშნა მან.

თამარ ბაჩალიაშვილის ოჯახის წევრები და ახლობლები FBI-ს ჩართვის მოთხოვნით აშშ-ს საელჩოსთან საპროტესტო აქციას მართავენ. აქციაზე მხარდასაჭერად მისულია სპეცოპერაციის დროს მოკლული თემირლან მაჩალიკაშვილის მამა, მალხაზ მაჩალიკაშვილი.

როგორც გარდაცვლილი თამარ ბაჩალიაშვილის დედა, თეონა თამაზაშვილი ჟურნალისტებთან ამბობს, გამომძიებლები საქმეს წელავენ და სათანადოდ არ იძიებენ. ის დარწმუნებულია, რომ მანქანიდან ყველა ნიმუში გააქრეს და კომპიუტერიდანაც ფაილები წაშალეს. თეონა თამაზაშვილის თქმით, FBI-ს გარეშე მასალების აღდგენა შეუძლებელი იქნება. იგი აშშ-ს ელჩს, კელი დეგნანსაც მიმართავს, რომ ექსპერტების ჩართვაში დაეხმაროს.