გიორგი რურუას ადვოკატი დიტო საძაგლისვილი ამბობს რომ გამამტყუნებელი განაჩენის მოლოდინი აქვს და თუ ასეთი იქნება, სააპელაციო სასამართლოში გაასაჩივრებს.

"როგორც თავდაპირველი გადაწყვეტილება იყო პოლიტიკური, ველოდებით, რომ საბოლოო გადაწყვეტილებაც იქნება პოლიტიკური და არა სამართლებრივი".

გიორგი რურუას საქმეზე სასამართლო საბოლოო განაჩენს ხვალ, 30 ივლისს გამოაცხადებს. სხდომა თბილისის საქალაქო სასამართლოში 11:00 საათზეა ჩანიშნული.

დღევანდელ პროცესზე რურუამ საბოლოო სიტყვა წარმოთქვა და მხარდაჭერისთვის ყველას მადლობა გადაუხადა:

"ჩვენ წინააღმდეგ გააყალბეს მტკიცებულებები საბჭოთა პროპაგანდის კლასიკური გაგებით, საბჭოთა პრესის ხელით ცდილობენ ჩვენი სახელების გატეხვას. ეს არის პოლიტიკური დევნა ოლიგარქის მხრიდან და მიზეზი, თუ რატომ მივხვდი მათ ხელში, არის დამოუკიდებელი ტელევიზიის შეძენა, ანტისაოკუპაციო აქციების მხარდაჭერა და მკვეთრად გამოხატული ნეგატიური დამოკიდებულება ხელისუფლების მიმართ…".

მოსამართლემ მას სიტყვა გააწყვეტინა და მიუთითა, რომ უშუალოდ მის საქმეზე ისაუბროს. გიორგი რურუამ მადლობა გადაუხადა ელჩებს 8 მარტის შეთანხმებაზე გაწეული სამუშაოსთვის. სასამართლოს მან "ცინიკური ფარსი" უწოდა.

"მე თავს დამნაშავედ არ ვცნობ და ყველა ბრალდება აბსურდია. მივმართავ ახალგაზრდა თანამებრძოლებს და ჩვენი ქვეყნის თავისუფალ მოქალაქეებს: წელს გაიმართება საქართველო-რუსეთის ბრძოლა. ამ არჩევნებში უნდა დავამარცხოთ რუსული ოლიგარქია, ოლიგარქია დამარცხებულია და ეს ჩანს მის ყოველ ნაბიჯში. საქმეს ბოლომდე მიყვანა უნდა, გაფორმება უნდა", — თქვა რურუამ.

პროცესს გიორგი რურუას ახლობლებთან ერთად ევროპული საქართველოსა და ნაციონალური მოძრაობის დეპუტატები ესწრებოდნენ.

რურუა ერთ-ერთია იმათგან, ვის გათავისუფლებასაც ოპოზიცია 8 მარტის შეთანხმების ფარგლებში ითხოვს.

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.