ქართული ოცნების გენერალური მდივნის, კახა კალაძის განცხადებით, "დასაძრახი არ არის", რომ მათი პარტიის მიმართ პოლიტიკურ სიმპატიებს გამოხატავენ ცნობილი ექიმები, მათ შორის დაავადებათა კონტროლის ცენტრის ხელმძღვანელები. კალაძის მტკიცებით, პარტიის საარჩევნო სიაში მათ შეყვანას არ განიხილავენ, რადგან ისინი ქვეყანას იქ სჭირდებიან, სადაც არიან.

"დღეს ქვეყანაში ნებისმიერ ადამიანს, არ აქვს მნიშვნელობა თუ ვინ რა პროფესიისაა, აქვს თავიანთი ხედვა ამა თუ იმ საკითხზე, თუნდაც პოლიტიკურ პარტიებთან მიმართებაში და ეს ადამიანები არ მალავენ, რომ აქვთ გარკვეული სიმპატიები პარტია ქართული ოცნების მიმართ. აქ არაფერი დასაძრახი არ არის.

[სიაში შეყვანაზე] არ ყოფილა საუბარი. კიდევ ერთხელ ვიმეორებ, ეს არის ადამიანები, რომლებიც არიან თავისი საქმის პროფესიონალები და ისინი იმ ქვეყანას სჭირდება იქ, სადაც იმყოფებიან დღეს", — განაცხადა მან რუსთავი 2-ის ეთერში.

ქართული ოცნების მაჟორიტარი დეპუტატების წარდგენას ესწრებოდნენ NCDC-ის ხელმძღვანელები ამირან გამყრელიძე და პაატა იმნაძე, ასევე, ინფექციური საავადმყოფოსა და პირველი საუნივერსიტეტო კლინიკის დირექტორები თენგიზ ცერცვაძე და ლევან რატიანი. კითხვაზე, რატომ იყვნენ შეხვედრაზე, იმნაძემ და გამყრელიძემ განაცხადეს, რომ პარტიის მხარდამჭერები არიან.