საკონსტიტუციო სასამართლოს მიერ ორი ახალი ავტომობილის შეძენასთან დაკავშირებით განცხადებას ავრცელებს:

"2016 წლის ოქტომბერში, საქართველოს მთავარი პროკურატურის დადგენილების საფუძველზე, სისხლის სამართლის ერთ-ერთ საქმეზე მოხდა საკონსტიტუციო სასამართლოს მფლობელობაში არსებული ერთი ავტომობილის ექსპლუატაციიდან ამოღება. გარდა ამისა, საკონსტიტუციო სასამართლოს მფლობელობაში არსებული ავტოპარკის 90% არის მოძველებული და საჭიროებს გადაუდებელ განახლებას. შესაბამისად, არსებობდა ახალი ავტომობილების შეძენის საჭიროება. ამიტომ, სასამართლოს თავმჯდომარემ მის სარგებლობაში არსებული ორი ავტომობილიდან უარი თქვა ერთ-ერთის გამოყენებაზე, რათა დაზოგილიყო 2 ავტომობილისათვის საჭირო ხარჯები, სანაცვლოდ კი სასამართლომ შეიძინა ავტომობილები იმ მოსამართლეებისათვის, რომელთა ავტომობილებიც ყველაზე მეტად იყო გამოსული მწყობრიდან და შეკეთება უკავშირდებოდა მნიშვნელოვან ხარჯებს. შესყიდვის შედეგად 2004 წელს და 2007 წელს წარმოებული ავტომობილები ორი ახალი ავტომობილით ჩანაცვლდა".

საკონსტიტუციო სასამართლოს განცხადებით, თავმჯდომარე მომავალშიც აქტიურად აპირებს გაატაროს ღონისძიებები მატერიალურ-ტექნიკური ბაზის განახლება, რათა სასამართლოს ყველა წევრსა და თანამშრომელს შეუქმნას მუშაობის ღირსეული პირობები. მათივე ცნობით, ავტომობილების ჩანაცვლებისათვის საქართველოს მოქმედი კანონმდებლობა არ ითხოვს ტენდერის ჩატარებას, შესაბამისად შესყიდვა განხორციელდა გამარტივებული გზით.

საკონსტიტუციო სასამართლომ 2016 წლის 1 დეკემბერს ორი ახალი, Toyota Rav4 prestige შეიძინა. ხელშეკრულების ღირებულება 139 700 ლარია.