თინეიჯერი მუტანტი კუ ნინძების ფანებს აურაცხელი რაოდენობის პიცა დაგჭირდებათ ფრენჩაიზის ახლახანს დაანონსებული რიბუთის აღსანიშნავად!

როგორც Nickelodeon იტყობინება, თინეიჯერი მუტანტი კუ-ნინძების ახალ CG-ანიმირებულ კინოსურათზე სეთ როგენი, ევან გოლდბერგი და ჯეიმზ უივერი იმუშავებენ. ფილმს გადაიღებს ჯეფ როუვი, სცენარის ავტორი კი ბრენდან ო'ბრაიანი იქნება.

"სეთის, ევანისა და ჯეიმზის გენიის შემატება იმ იუმორისა და ექშენისთვის, რომლებიც უკვეა TMNT-ის განუყოფელი ნაწილი, ამ ფილმს სრულიად ახალი დონის გადააზრებად აქცევს. მოუთმენლად ველი მათ ნამუშევარს და ვიცი, რომ რემზი ნაიტოსა და მის გუნდს ძალიან უხარიათ Nick Animation Studio-ს მორიგი დიდებული მიმართულებით წაყვანა თავიანთი პირველი CG-ანიმირებული სურათით", — თქვა Nickelodeon-ის პრეზიდენტმა ბრაიან რობინსმა.

თინეიჯერი მუტანტი კუ-ნინძები ფართო მასებს 1984 წლის ამავე სახელწოდების კომიქსით გაეცნენ, რომელიც Mirage Studios-თვის შექმნეს კევინ ისტმანმა და პიტერ ლეირდმა. დანაშაულთან მებრძოლი ქვეწარმავლების — ლეონარდოს, დონატელოს, რაფაელისა და მიქელანჯელოს — პოპულარობამ სათავე დაუდო ფრენჩაიზს, რომელიც მოიცავს ოთხ ანიმაციურ სერიალს, ვიდეოთამაშებს, სათამაშოებსა და სხვა სავაჭრო საქონელს.

პიცის მოყვარული კუების სრულმეტრაჟიანი დებიუტი 1990 წელს შედგა ფილმით Teenage Mutant Ninja Turtles, რომელსაც მოყვა Teenage Mutant Ninja Turtles II: The Secret of the Ooze და Teenage Mutant Ninja Turtles III. ორიგინალი ფილმების რიბუთი Nickelodeon Movies-მა Paramount Pictures-თან ერთად გამოუშვა 2014 წელს, რასაც 2016-ში სიქველი მოყვა. 2019 წელს ასევე გამოვიდა ანიმაცია Batman vs. Teenage Mutant Ninja Turtles, რომელშიც კუ-ნინძები და ბეტმენი გადაიკვეთნენ.

აქამდე უკვე გამოცხადდა, რომ Nickelodeon და Netflix თანამშრომლობენ კუ-ნინძების ცალკეულ პროექტზე — ანიმაციურ 2D ფილმზე, რომელიც მიმდინარე Rise of the Teenage Mutant Ninja Turtles სერიას ეფუძნება.