სახალხო დამცველი, ნინო ლომჯარია 19 წლის ფეხბურთელის დაღუპვის ამბავს ეხმაურება და წერს, რომ ახალგაზრდების სიცოცხლე ქუჩურ გარჩევებს ისევ ეწირება. ომბუდმსენი ამის შესახებ ფეისბუქის საკუთარ გვერდზე წერს:

"ძალიან მძიმე მოსასმენია 19 წლის ფეხბურთელის დაღუპვის ამბავი... ვუსამძიმრებ გარდაცვლილის ოჯახის წევრებს და ახლობლებს. სამწუხაროდ, კრიმინალურ მენტალიტეტს, ქუჩურ-უბნურ გარჩევებს ახალგაზრდების სიცოცხლე ისევ ეწირება. მნიშვნელოვანია გამოძიება დროულად, ობიექტურად და სრულყოფილად წარიმართოს და ყველამ, ვინც შესაძლოა ფლობდეს ინფორმაციას საქმისთვის მნიშვნელოვანი გარემოებების თაობაზე, ითანამშრომლოს გამოძიებასთან".

დღეს, 22 ივნისს, 4-დღიანი ძებნის შემდეგ, მყვინთავებმა გიორგი შაქარაშვილის ცხედარი წყალში იპოვეს. საგანგებო სიტუაციების მართვის სამსახურის ინფორმაციით, საძიებო სამუშაოებში ჩართული იყო 70 მეხანძრე-მაშველი, 7 ნავი და ორი სპეციალური კატერი, რომელიც ფსკერის სკანირებას ახორციელებდა. სამძებრო სამუშაოებისთვის 20 ივნისს ზაჰესის დამბა გახსნეს და ჟინვალჰესის დამბა დაკეტეს, რამაც მდინარე არაგვში წყლის დონის დაწევა გამოიწვია, რათა სამძებრო სამუშაოები იქ გაგრძელებულიყო.