14 ივნისს აშშ-ის ამჟამინდელ პრეზიდენტს, დონალდ ტრამპს 74 წელი შეუსრულდა და სოციალურ ქსელ ტვიტერის მომხმარებლების ნაწილმა გადაწყვიტა, რომ მისთვის ამ დღის მილოცვის ნაცვლად, ყოფილი პრეზიდენტისთვის, ბარაკ ობამასთვის მიეგო პატივი.

ტვიტერზე ამ დამოკიდებულების გამოსახატად რამდენიმე ფრაზას იყენებდნენ, მათ შორის ერთ-ერთი იყო "ყველას დაბადების დღე მნიშვნელოვანია".

"შემეძლო თავისთვის ძვირფასი დღე დონალდ ტრამპისთვის მიმელოცა, მაგრამ ამ ყველაფრის შემდეგ #ყველასდაბადებისდღემნიშვნელოვანია", — დაწერა მსახიობმა ჯორჯ ტაკეიმ.

ჰეშთეგი "ყველას დაბადების დღე მნიშვნელოვანია" მინიშნებაა ფრაზაზე "ყველას სიცოცხლე მნიშვნელოვანია", რომელმაც კრიტიკა დაიმსახურა, რადგან ის ანტირასისტული მოძრაობის შავკანიანთა სიცოცხლე მნიშვნელოვანია საპასუხოდ შეიქმნა და ბევრის აზრით, სწორედ შავკანიანი მოქალაქეების სისტემური პრობლემებიდან ყურადღების გადატანას ისახავს მიზნად.

სწორედ ამ ფრაზის არასწორი დამოკიდებულების კიდევ ერთხელ გამოსააშკარავებლად გამოიყენეს "ყველას დაბადების დღე მნიშვნელოვანია" 14 ივნისს, დონალდ ტრამპის დაბადების დღეზე.

ზოგიერთმა მომხმარებელმა ამ ჰეშთეგით ის შავკანიანი მოქალაქეები გაიხსენა, რომლებიც დაკავების დროს სხვადასხვა დროს გარდაიცვალნენ: ჯორჯ ფლოიდი, ბრეონა ტეილორი, ტამირ რაისი და სხვა.

სხვებმა კი ამ დღეს აშშ-ის ყოფილი პრეზიდენტი, ბარაკ ობამა გაიხსენეს და მის მიმართ საქებარი სიტყვები არ დაიშურეს.

"დიდი პატივი იყო თქვენთან მუშაობა, პრეზიდენტო", — წერს დიპლომატი და პოლიტიკის მეცნიერების პროფესორი, მაიკლ მაკფოლი.