სამი ოქროს გლობუსისა და ორი ოსკარის მფლობელი ჰოლივუდის მსახიობი, ჯორჯ კლუნი ამერიკის შეერთებულ შტატებში ბოლო დღეების განმავლობაში მიმდინარე მოვლენებს გამოეხმაურა და პოლიციელების მიერ დაპატიმრებისას ჯორჯ ფლოიდის გარდაცვალების ფაქტზე საჯაროდ გამოქვეყნებულ ესეში ისაუბრა.

"ჩვენ ვნახეთ, როგორ შეწყვიტა მან სუნთქვა ოთხი პოლიციელის ხელებში", — წერს ჯორჯ კლუნი და მხარს უჭერს იმ მილიონობით ადამიანს, რომლებიც მთელ მსოფლიოში ამ ფაქტს გმობენ და რასიზმს უპირისპირდებიან.

59 წლის მსახიობმა აშშ-ში სისტემური რასიზმის პრობლემაზე კრიტიკულად ისაუბრა:

"არ ვიცით, რა შედეგებამდე მივა ეს პროტესტი. ვილოცოთ და ვიმედოვნოთ, რომ ამის გამო არავინ დაიღუპება. თუმცა ისიც ვიცით, რომ ბევრი არაფერი შეიცვლება. ქუჩებში ამოხეთქილი სიბრაზისა და იმედგაცრუების გრძნობა კიდევ ერთხელ გვახსენებს, თუ რა მცირედით გაიზარდა ჩვენი ქვეყანა მონობის თავდაპირველი ცოდვის შემდეგ".

ჯორჯ კლუნმა რასიზმი პანდემიას შეადარა:

"ეს ჩვენი პანდემიაა: ყველანი ინფიცირებულები ვართ და 400 წელია მისი საწინააღმდეგო ვაქცინა ვერ გვიპოვია.

Syriana-ს, Ocean's Thirteen-სა და Solaris-ის ვარსკვლავის აზრით, უკეთესი ცვლილებების იმედი მხოლოდ არჩევნებია:

"ჩვენ ისეთი პოლიტიკოსები გვჭირდება, რომლებიც ყველა მოქალაქის სამართლიან მოთხოვნებს თანაბრად ითვალისწინებენ და არა ისეთი, რომელიც ხალხში სიძულვილსა და ზიზღს აღვივებს. მნიშვნელოვანი ცვლილებების მისაღწევად კი მოსახლეობას ერთადერთი გამოსავალი რჩება: არჩევნებში ხმის მიცემა".

ფოტო: AP

ჯორჯ ფლოიდი 25 მაისს დაპატიმრების დროს გარდაიცვალა, ამ ფაქტის ამსახველი ვიდეო კი ინტერნეტსა და მედიაში გავრცელდა, რასაც მთელი ქვეყნის მასშტაბით საპროტესტო აქციების ტალღა მოჰყვა, დაკავებაში მონაწილე პოლიციელი კი მკვლელობის ბრალდებით დააპატიმრეს.

პოლიციელების მიერ გადაჭარბებული უფლება-მოვალეობების პრაქტიკასა და სისტემური რასიზმის პრობლემებს გამოეხმაურა ცნობილი რეჟისორი სპაიკ ლიც და სპეციალური მოკლემეტრაჟიანი ფილმი გაავრცელა.