ზარაში, ბერშკაში, მასიმო დუტიში და კიდევ რამდენიმე მაღაზიაში ტანსაცმლის გასახდელი ოთახები დროებით გაუქმდება. როგორც კომპანია რითეილ გრუპ ჯორჯიას დირექტორმა, რეზო მაღალაშვილმა On.ge-ს უთხრა, აღნიშნული ზომები პანდემიის დროს უსაფრთხოებას დაცვაუკავშირდება.

რითეილ გრუპ ჯორჯია თბილისში 60 მაღაზიას ფლობს, რომელიც წარმოადგენს ისეთ ბრენდებს, როგორიცაა ზარა, ბერშკა, მასიმო დუტი, მანგო, მარკს ენდ სპენსერი, გეპი და ა.შ.

რეზო მაღალაშვილის თქმით, გასახდელი ოთახები და მაღალი რისკის ზონებად მიიჩნევა.

"ჩვენ საერთაშორისო კომპანი ვართ 11 ქვეყანაში ვოპერირებთ და 9-ში უკვე გავიხსენით. დაგვიგროვდა გამოცდილება პანდემიის პერიოდში ეკონომიკის გახსნასთან ერთად, როგორ დავიწყეთ ოპერირება. გადავწყვიტეთ, ზოგიერთი რამ აქ გადმოვიღოთ. გარდა იმ რეგულაციებისა, რაც სახელმწიფომ გამოაქვეყნა და რომლის 100 პროცენტს ვაკმაყოფილებთ, დამატებით გადავწყვიტეთ ჩვენი თანამშრომლებისა და მომხმარებლების უსაფრთხოებიდან გამომდინარე გავაუქმოთ დროებით გასახდელები", — აღნიშნა მან.

როგორც მაღალაშვილი ამბობს, მომხმარებელს ტანსაცმლის დაბრუნების ან გადაცვლის ვადაც სამი დღიდან ერთ კვირამდე გაიზრდება. ამასთან, დაბრუნებული ტანსაცმელი ცალკე მოთავსდება, სადაც დეზინფექცია ჩაუტარდება და დახლზე 48 საათში დაბრუნდება.