დევიდ ლინჩმა ახალი ანიმაცია გამოუშვა, რომელსაც მისი შემოქმედების ერთგული გულშემატკივრები წლების განმავლობაში ელოდნენ.

ამ ცნობილმა რეჟისორმა ეს ანიმაციური პროექტი ჯერ კიდევ 2015 წელს დააანონსა, როცა განაცხადა, რომ პოლონელ მუსიკოს მარეკ ზებროვსკისთან კოლაბორაციაში აპირებდა მოკლემეტრაჟიან ანიმაციურ ფილმზე მუშაობას.

ხუთი წლის შემდეგ კი მაყურებლებს შეუძლიათ მათი შრომის შედეგი შეაფასონ და თანაც სრულიად უფასოდ: დევიდ ლინჩმა ათწუთიანი ანიმაცია ყველასათვის ხელმისაწვდომად იუთუბზე გამოაქვეყნა.

დევიდ ლინჩმა ზებროვსკი ფილმის Inland Empire-ის გადაღებებზე გაიცნო, როცა ის მის თარჯიმნად მუშაობდა. ეს ამ პოლონელი მუსიკოსისა და ამერიკელი რეჟისორის პირველი თანამშრომლობა არ არის: მათ 2007 წელს გამოუშვეს საერთო მუსიკალური ალბომი Polish Night Music.

"ჩვენი ექსპერიმენტის მთელი იდეა ის იყო, რომ მე ჩემი ჩანაფიქრის შესახებ მას არაფერს ვეტყოდი, მარეკს კი ვიზუალის მიხედვით მუსიკა თავისი ინტერპრეტაციით უნდა შეექმნა", — განაცხადა ლიჩმა ამ ექსპერიმენტულ პროექტზე საუბრისას.

ეს მეორე მოკლემეტრაჟიანი ანიმაციური ფილმია, რომელიც რეჟისორმა წელს გამოაქვეყნა: წლის დასაწყისში ნეტფლიქსის პლატფორმაზე გამოჩნდა მისი ახალი ნამუშევარი What Did Jack Do?