ქართული ოცნების ერთ-ერთი ლიდერის, ირაკლი კობახიძის განცხადებით, პარტია ეთანხმება პრეზიდენტს, რომ ირაკლი ოქრუაშვილისა და გიგი უგულავას ციხეში ყოფნა რამე პრობლემას შექმნიდა. ამის შესახებ კობახიძემ პარტიის ოფისში გამართულ საგანგებო ბრიფინგზე განაცხადა.

"შეიძლება პრეზიდენტს ჰქონდა თავისი პრაგმატული მოსაზრებები, შეიძლება ჰქონდა თავისი კეთილშობილური გათვლები, თუმცა ჩვენ არ ვეთანხმებით პრეზიდენტს იმაში, რომ რაიმე ტიპის პრობლემის შექმნა შეეძლო ამ ორი კრიმინალის ციხეში ყოფნას, ქვეყნის შიგნით თუ ქვეყნის გარეთ", — კობახიძე.

ჟურნალისტების კითხვაზე პასუხის გაცემამდე კობახიძემ პარტიის ერთიანი განცხადება წაიკითხა. მისი თქმით, ქართული პოლიტიკის პოლარიზაციას განაპირობებს არა "კრიმინალების ციხეში ყოფნა, არამედ მათი ყოფნა პოლიტიკაში".

"შესაძლოა, პრეზიდენტს რეალურად მიაჩნია, რომ ბიუჯეტის ქურდისა და პარლამენტში შეჭრის მოსურნე, რუსული სპეცსამსახურის აგენტის გათავისუფლება ამ ეტაპზე ხელს შეუწყობს პოლიტიკური და საარჩევნო გარემოს დეპოლარიზაციას.

თუმცა ჩვენ ვფიქრობთ, რომ ქართული პოლიტიკის პოლარიზაციას განაპირობებს არა კრიმინალების ციხეში ყოფნა, არამედ მათი ყოფნა პოლიტიკაში. არც იმას ვფიქრობთ, რომ ორი პოლიტკრიმინალის ციხეში ყოფნა საგარეო კუთხით რაიმე პრობლემა შექმნიდა. ჩვენ ცალკეული პოლიტიკოსებისგან არაერთხელ მიგვიღია პოლიტკრიმინალების დასაცავი წერილები, თუმცა ამას ხელი არ შეუძლია იმისთვის, რომ კრიმინალური ლიდერების ერთი ნაწილი ციხეში ზის, ხოლო მეორე ნაწილი მსჯავრდებულია და ქვეყნიდანაა გაქცეული", — თქვა კობახიძემ.

დღეს, 15 მაისს, პრეზიდენტმა სალომე ზურაბიშვილმა გიგი უგულავა და ირაკლი ოქრუაშვილი შეიწყალა.