ამერიკელმა რეჟისორმა ჯორდან პილმა თავისი გახმაურებული კინოსურათებით Get Out და Us ჯერ კინომოყვარულები მოხიბლა, შემდეგ კი The Twilight Zone-ის პროდიუსერობით სატელევიზო სივრცეშიც დაიმკვიდრა სახელი.

მალე სწორედ ამ შოუს მეორე სეზონს იხილავს მაყურებელი.

The Twilight Zone-ის პირველი სეზონის პრემიერა 2019 წელს შედგა და ის ამავე სახელწოდების მქონე 1959 წელს გამოსული როდ სერლინგის გახმაურებული სატელევიზიო შოუს მიხედვით გადაიღეს.

ამ ცნობილი რიმეიქის მეორე სეზონის ახალი ტრეილერი, რომელიც წინ კიდევ უფრო საინტერესო ისტორიებს გვიმზადებს, რამდენიმე საათის წინ გავრცელდა:

The Twilight Zone ანთოლოგიის ტიპის სერიალია და მისი ყოველი ეპიზოდი განსხვავებულ, დამოუკიდებელ ამბავს მოგვითხრობს სამეცნიერო ფანტასტიკის, ფენტეზის, თრილერის ან საშინელებათა ჟანრში.

ახალი სეზონის ოფიციალურ აღწერაში ვკითხულობთ: "სერიალის მეორე სეზონი თვითანალიზსა და თვითგამოკვლევას მიმართავს, რათა მაყურებლები უსაზღვრო შესაძლებლობებით სავსე განზომილებაში გადაიყვანოს".

სულ ცოტა ხნის წინ გამოქვეყნებული ტრეილერიდანაც ვიგებთ, რომ შოუში ისეთ ცნობილ მსახიობებს ვიხილავთ, როგორებიც არიან ბილი პორტერი, ჯენა ელფმენი, სკაი ფერეირა, ტონი ჰეილი, გილიან ჯეიკობსი, კრის მელონი და სხვა.

The Twilight Zone-ის მეორე სეზონის პრემიერა ტელეარხ CBS-ზე 25 ივნისს შედგება.

ფოტო: CBS