9 მაისთან დაკავშირებით შინაგან საქმეთა სამინისტრო მოქალაქეებს აფრთხილებს, რომ საგანგებო მდგომარეობით გათვალისწინებული შეზღუდვები გრძელდება და აკრძალულია შეკრება/მანიფესტაცია, ასევე, ყველა ტიპის კულტურული ღონისძიების ჩატარება, როგორც ღია, ისე დახურულ სივრცეში. აქედან გამომდინარე, უწყება აცხადებს, რომ ხვალ ვაკის პარკში შესვლა-გამოსვლას და შეზღუდვების შესრულებას გააკონტროლებენ.

ასევე, შსს კიდევ ერთხელ აფრთხილებს მოქალაქეეს, რომ იკრძალება კომუნისტური ტოტალიტარული და ფაშისტური იდეოლოგიების მატარებელი სიმბოლიკის გამოყენება და სამართალდარღვევა 1 000-ლარიან ჯარიმას გამოიწვევს.

ხვალ მეორე მსოფლიო ომის ვეტერანები ფაშიზმზე გამარჯვებას აღნიშნავენ. ევროპული ქვეყნების აბსოლუტური უმრავლესობა, გარდა პოსტსაბჭოთა ქვეყნების ნაწილისა ფაშიზმზე გამარჯვების დღედ 8 მაისს მიიჩნევს, რადგან სწორედ ამ დღეს გამოაცხადა გერმანიამ კაპიტულაცია. 9 მაისი კი საბჭოთა კავშირის დაწესებული დღესასწაულია, რადგან სწორედ ამ დღეს წითელ მოედანზე სამხედრო აღლუმით აღნიშნეს გამარჯვება.