საპარლამენტო უმრავლესობის წევრი, რომან კაკულია ამბობს, რომ ხელისუფლებასა და საპატრიარქოს შორის მიღწეული შეთანხმება ამ ეტაპზე სწორია.

მისი თქმით, ახლა "უფრო მეტი ხისტ ჩარევებს" შესაძლოა, რომ უფრო მეტი დაპირისპირების საგანი გამხდარიყო და "ჭკვიანური" გადაწყვეტილება არ იქნებოდა.

"ამიტომ აქ ძალიან მნიშვნელოვანია თვითონ ეკლესიის პოზიცია და თითოეული მოქალაქის პოზიცია, რომელმაც თავისი გვერდზე მდგომი თანამოქალაქე არ უნდა ჩააყენოს უხერხულ მდგომარეობაში. იმ შემთხვევაშიც თუ მისი გაგებით მისი თანამოქალაქის შიში არის უსაფუძვლო, მისთვის ანგარიშის გაწევა რელიგიის ერთ-ერთი მთავარი მოცემულობაა და სწორედ ასე უნდა იქნა ეს დანახული", — განუცხადა რომან კაკულიამ TV პირველს.

15 აპრილს, საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება.

ამის შესახებ ინფორმაცია საპატრიარქოს პრესსპიკერმა, ანდრია ჯაღმაიძემ და პრემიერ-მინისტრის პრესსპიკერმა, ირაკლი ჩიქოვანმა თანმიმდევრულად გააჟღერეს. ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, რომ ყველა ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: