ნაციონალური მოძრაობის ლიდერის, გრიგოლ ვაშაძის თქმით, ხელისუფლებას და ოპოზიციას შორის ვერანაირი შეთანხმება ვერ შედგება პოლიტიკური პატიმრების გათავისუფლების გარეშე. ამ თემაზე ვაშაძემ გამარჯვებული საქართველოს ლიდერის, ირაკლი ოქრუაშვილის სასამართლო პროცესის შემდეგ ისაუბრა.

"ერთი მტკიცებულება მაინც მოიტანონ. იქ არ ვყოფილიყავი მაინც, დღის 12 საათიდან მეორე დილის 7 საათამდე. აბსოლუტურად სამარცხვინოა. მონახონ გამოსავალი, წინააღმდეგ შემთხვევაში ეს პანდემია დამთავრდება და მიიღებენ საკადრისს პასუხს", — თქვა გრიგოლ ვაშაძემ.

ვაშაძის განცხადებით, ხელისუფლებას ჰგონია, რომ პანდემიის გამო მოძლიერდნენ და პრობლემები არ ექნებათ. მისი თქმით, ოპოზიცია აუცილებლად დაიწყებს სანქციებზე საუბარს, თუ საარჩევნო სისტემასთან დაკავშირებული შეთანხმების ორივე ნაწილი არ შესრულდება.

დღეს, 13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორისა ნაცინალური მოძრაობის ერთ-ერთი ლიდერი ნიკა მელიაც, რომელიც განაჩენს ელოდება.