მოქალაქეებმა დღეს სტამბოლში გააპროტესტეს უძველესი თურქული გაზეთის, Cumhuriyet–ის მთავარი რედაქტორისა და 8 ჟურნალისტის დაპატიმრება, თუმცა, ხელისუფლებამ აქცია ცრემლსადენი გაზითა და წყლის ჭავლით დაარბია.

ერდოღანის ხელისუფლებამ ჟურნალისტები თურქეთის მიერ ძებნილ ფეტულა გიულენთან და ქურთების მშრომელთა პარტიასთან თანამშრომლობის ბრალდებით დააკავა. თუმცა, აქტივისტები მიიჩნევენ, რომ ეს არის ერდოღანის ანგარიშსწორება 1924 წელს დაფუძნებული გაზეთის, Cumhuriyet–ის მიმართ, რადგან ის იმ გამონაკლის თურქულ მედიასაშუალებებს შორისაა, რომელიც ხელისუფლების მიმართ კრიტიკულია. აქცია ჟურნალისტთა მხარდასაჭერად გვერდში უდგანან სხვა თურქი ჟურნალისტები და გაერთიანებები, ასევე თურქეთის პრო–ქურთული, სახალხო დემოკრატიული პარტია.

ევრონიუსის ინფორმაციით, აქციის მონაწილეებს ხელში ეჭირათ ყოველდღიური გაზეთის პირველი გვერდი, რომელსაც ეწერა "ისტორია შეგარცხვენთ!".

უფლებადამცველები უკვე ღიად საუბრობენ იმის შესახებ, რომ რეჯეპ ტაიპ ერდოღანმა 2016 წლის ზაფხულში მომხდარი გადატრიალების მცდელობა ოპონენტებისა და მედიის წინააღმდეგ საბრძოლველად აქტიურად გამოიყენა. აღნიშნული ფაქტის შემდეგ თურქეთში თანამდებობიდან გაათავისუფლეს, ან დააპატიმრეს 100 ათასზე მეტი პოლიციელი, მასწავლებელი, მოსამართლე, ჟურნალისტი, თუ პროკურორი.