საელჩოს ინფორმაციით, ამერიკის შეერთებული შტატები გმობს რუსეთის მიერ საქართველოს წინააღმდეგ განხორციელებულ კიბერშეტევას, რომლის დროსაც 15 000-ზე მეტი საიტი დაიჰაკა. აშშ მოუწოდებს რუსეთს, შეწყვიტოს მსგავსი ქმედებები და პირობას აძლევს ქართველ ხალხს, რომ დაეხმარებიან მავნე კიბერაქტორებთან ბრძოლაში.

"პირობას ვდებთ საქართველოსა და მისი ხალხის წინაშე, რომ მხარს დავუჭერთ კიბერუსაფრთხოების გაძლიერებაში და მავნე კიბერ აქტორებთან ბრძოლაში. საქართველოს საჯარო ინსტიტუტების განმტკიცებისა და მისი შესაძლებლობის გაძლიერებისთვის, ჩვენ [საქართველოს] შევთავაზებთ დამატებითი შესაძლებლობების განვითარებას და ტექნიკურ დახმარებას, მსგავსი ქმედებებისგან თავდასაცავად", — აცხადებენ საელჩოში.

მათივე თქმით, მსგავსი ქმედებები რუსეთის მხრიდან ეწინააღმდეგება მათივე მცდელობებს, რომ კიბერსივრცეში თავი პასუხისმგებლიან აქტორად წარმოაჩინონ.

"ეს წარმოადგენს რუსეთის გრუ-ს მიერ რიგი ქვეყნების წინააღმდეგ განხორციელებულ უპასუხისმგებლო კიბეროპერაციების უწყვეტ სქემას. ამ ოპერაციების მიზანია განხეთქილების შეტანა, დაუცველობის შექმნა და დემოკრატიული ინსტიტუტებისთვის ძირის გამოთხრა", — წერია საელჩოს განცხადებაში.

საელჩოს განცხადებას რამდენიმე წუთით წინ უსწრებდა საგარეო საქმეთა სამინისტროს პრესკონფერენცია, რომელზეც განაცხადეს, რომ საერთაშორისო პარტნიორებთან თანამშრომლობით კიბერთავდასხმაში რუსული კვალი გამოკვეთეს. მათი განმარტებით, კიბერშეტევა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ დაიგეგმა და განხორციელდა.

2019 წლის 28 ოქტომბერს ერთდროულად 15 ათასზე მეტი ვებგვერდი დაიჰაკა. კიბერთავდასხმის მსხვერპლი პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოს, სახელმწიფო, კომერციული და მედია ორგანიზაციების ვებგვერდები გახდა. მაშინ ვებგვერდებზე გამოჩნდა ყოფილი პრეზიდენტის, მიხეილ სააკაშვილის ფოტო წარწერით "I'll Be Back".