პარლამენტში ქართული ოცნების ყოფილი დეპუტატი, ზვიად კვაჭანტირაძე აცხადებს, რომ ფაქტების დამდგენი მისიის მიწვევით ხელისუფლება ადასტურებს, რომ ქვეყანაში სავალალო მდგომარეობაა. ამის შესახებ დეპუტატმა სოფო ზურაბიანის პოლიტიკის ფორმულაში მას შემდეგ ისაუბრა, რაც სტრასბურგში ევროპარლამენტის კომიტეტის გაერთიანებულ სხდომას დაესწრო.

"ვისაც ამ ტერმინის მნიშვნელობა ესმის, იმან კარგად იცის, რომ მსგავსი მისიის მოთხოვნით ზოგადად ოპოზიციონერები გამოდიან ხოლმე. მე არ მახსენდება ფაქტი, რომ ევროკავშირს ჩვენი ურთიერთობების ნებისმიერ ეტაპზე მსგავსი წინადადება საქართველოსგან მიეღოს, თუნდაც ოპოზიციის მხრიდან. აღარაფერს არ ვიტყვი იმაზე, რომ ხელისუფლების მხრიდან გაჟღერდა ასეთი დაპატიჟება. უნდა გავითვალისწინოთ, რომ როდესაც მსგავსი მისიები იგზავნება ქვეყანაში, იქ საქმე კარგად არ არის", — განაცხადა ზვიად კვაჭანტირაძემ.

ქართული ოცნების დეპუტატმა, ირაკლი კობახიძემ თქვა, რომ ევროპარლამენტარები საქართველოში უნდა ჩამოვიდნენ და შეისწავლონ თბილისის ყოფილი მერის საქმე. ქართულმა ოცნებამ ევროპარლამანეტარებს შესთავაზა, რომ ფაქტების დამდგენი კომისია შეიქმნას, რომელიც უგულავას საქმეს დეტალურად შეისწავლის.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".