სახალხო დამცველი, ნინო ლომჯარია მწუხარებას გამოთქვამს იმის გამო, რომ პრეზიდენტმა დეკანოზი გიორგი მამალაძე არ შეიწყალა. ომბუდსმენი ყურადღებას ამახვილებს გამოძიებისა და სასამრთლოს დროს გამოვლენილ ხარვეზებზე და ამბობს, რომ გამამტყუნებელი განაჩენი არ იყო საკმარისად დასაბუთებული, მტკიცების ტვირთი ბრალდებულზე იქნა გადატანილი და მტკიცებულებათა შეფასებისას გონივრულად წარმოშობილი ეჭვი ბრალდებულის საწინააღმდეგოდ გადაწყდა.

ასევე სახალხო დამცველი ეხმაურება პრეზიდენტის დღევანდელ განცხადებას პატრიარქის სიცოცხლის ხელყოფაზე. მისი თქით, პრეზიდენტის მინიშნება პატრიარქის სიცოცხლის ხელყოფის მცდელობაზე არის ვერსია, რომელიც გამოძებისა და სასამართლოს მიმდინარეობის დროს არ განხილულა.

"სახალხო დამცველი წლების განმავლობაში, მათ შორის, შეწყალების კომისიის წევრობის დროს, მხარს უჭერდა გიორგი მამალაძის შეწყალებას. შეწყალების კომისიის გაუქმების შემდგომ სახალხო დამცველი პრეზიდენტს მოუწოდებდა, გიორგი მამალაძის შეწყალების საკითხი განხილულიყო შესაბამისი პროცედურების დამტკიცებისთანავე.

სახალხო დამცველი წუხილს გამოთქვამს საქართველოს პრეზიდენტის გადაწყვეტილების გამო, რომლის შედეგადაც გიორგი მამალაძის ბრალდების საქმეში გამოკვეთილი სამართლებრივი ხარვეზები შესაბამისი შეფასების გარეშე დარჩა" — ნათვქამიას სახალხო დამცველის განცხადებაში.

დღეს, 6 იანვარს, ცნობილი გახდა, რომ რამდენიმეთვიანი მორატორიუმის შემდეგ პრეზიდენტმა საშობაოდ 5 მსჯავრდებული შეიწყალა. თუმცა, საპატრიარქოს შუამდგომლობის მიუხედავად, შეწყალებულთა შორის ვერ მოხვდა დეკანოზი გიორგი მამალაძე.