შვილმკვდარმა მამამ, მალხაზ მაჩალიკაშვილმა, რომელსაც მერიამ საპროტესტო კარავი დაუშალა და იმ ადგილას საბავშვო ბატუტი დაუდგა, მშობლებს სთხოვა, რომ შვილები იქ არ მიიყვანონ. მაჩალიკაშვილი მიმართვაში ამბობს, რომ ის ადგილი, საიდანაც სამი წელია შვილის მკვლელის სახელის გარკვევას ცდილობს, ბავშვებისთვის საზეიმო არ არის.

"თანამდებობის პირებისგან განსხვავებით, ბავშვები ძალიან მიყვარს და მათი გულისთვის ვიბრძვი. ვიცი თემირლანს არავინ და ვერავინ დამიბრუნებს. ამ გაუსაძლის პირობებში, როგორც კუთხეში მომწყვდეული დაჭრილი მხეცი, ვცდილობ თქვენი შვილებისთვის ვიბრძოლო, რომ ისინი უსაფრთხოდ იყვნენ საწოლში მძინარეც და ქუჩებშიც.

თბილისი დიდია არის სახალწლო სოფელიც, ჩემი თხოვნაა ნუ გამოიყვანთ პარლამენტის წინ თქვენს შვილებს; იქ მესამე ახალწელს ქუჩაში იმის მოთხოვნით ვდგავარ, რომ მითხრან ვინ არის ჩემი შვილის მკვლელი", — წერს მაჩალიკაშვილი ფეისბუქზე.

ახლა პარლამენტის წინ შვილმოკლული მამისა და დეკანოზის ძის საპროტესტო კარვების ნაცვლად ზვიგენის ბატუტი და ატრაქციონები დგას. ამას წინ უძღოდა ის, რომ თბილსერვისმა კარვები მანქანებით წაიღო და რუსთაველის გამზირი მორეცხა. პოლიციამ დააკავა 9 აქიტივისტი, რომელიც კარვების აშლას აპროტესტებდნენ.

თბილისის მერიამ კარვების აყრა საახალწლოდ, 2018 წელსაც სცადა. მაშინ რუსთაველის გამზირზე აქციებს ზაზა სარალიძე და მალხაზ მაჩალიკაშვილი ატარებდნენ. სამოქალაქო აქტივისტების, ოპოზიციისა და არასამთავრობო ორგანიზაციების წინააღმდეგობის შემდეგ თბილისის მერიამ კარვების აყრა ვერ შეძლო, რუსთველზე კი უფრო მეტი კარავი გაიშალა. მერიას მოუწია საახალწლო ღონისძიებები პირველი რესპუბლიკის მოედანზე გადაეტანა.

გაიგეთ მეტი პარლამენტთან მიმდინარე დაპირისპირებაზე: