შინაგან საქმეთა სამინისტროს ინფორმაციით, ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარებისა და გასაღების ბრალდებით ერთი პირი დააკავეს.

შსს-ს ცნობით, 1940 წელს დაბადებული მოქალაქე თბილისში, დიდუბის რაიონში დააკავეს. უწყების ინფორმაციით, სამართალდამცავებმა მისი პირადი ჩხრეკისას მაკაროვის სისტემის არარეგისტრირებული პისტოლეტი 8 ვაზნით, მისი ავტომანქანის ჩხრეკისას კი კალაშნიკოვის კონსტრუქციის არარეგისტრირებული ავტომატური ცეცხლსასროლი იარაღი 2 მჭიდითა და 60 საბრძოლო ვაზნით ამოიღეს.

შსს-ს ცნობით, გარდა ზემოაღნიშნულისა ბრალდებულის ბინის ჩხრეკისას სამართალდამცავებმა 740 ვაზნა ამოიღეს.

გამოძიება სისხლის სამართლის კოდექსის 236-ე მუხლის მე-2, მე-3 და მე-4 ნაწილებით მიმდინარეობს, რაც ცეცხლსასროლი იარაღისა და საბრძოლო მასალის შეძენას,შენახვას,ტარებას,დამზადებას,გადაზიდვას, გადაგზავნას ან გასაღებას გულისხმობს.