ავიაკომპანიებში სულ უფრო პოპულარული ხდება მომხარებლებისთვის თვითმფრინავში ისეთი ადგილების შეთავაზება, სადაც ბავშვებით არ შეწუხდებიან. ასეთი ავიაკომპანიები გარკვეული სახის ბილეთებს არ ყიდიან 12 წელზე ნაკლები ასაკის ბავშვებზე.

ერთ–ერთი ავიაკომპანია, რომელიც მომხმარებლებს ბავშვებისგან თავისუფალ ზონას სთავაზობს, არის ინდური IndiGo. აღნიშნული ავიაკომპანია აცხადებს, რომ ის თვითმფრინავში რამდენიმე რიგში ადგილებს არ გაყიდის ბავშვებზე, რათა უზრუნველყოს იმ ადამიანთა მშვიდი მგზავრობა, რომლებიც ბავშვების გარეშე გადაადგილდებიან. მათ, ვისაც მსგავსი ადგილის შეძენა მოუნდებათ, დამატებით კომფორტში $6–დან $20–მდე გადახდა მოუწევთ.

ჯერჯერობით, მსგავსი სერვისი მხოლოდ აზიურ ავიაკომპანიებს აქვთ, მათ შორის ეარ აზიას და მალაიზიის ავიახაზებს.

როგორც Los Angeles Times წერს, აღნიშნულმა იდეამ პოპულარობა და დიდი ყურადღება მიიქცია ამერიკაში. მართალია, ჯერჯერობით არცერთ ამერიკულ და ევროპულ ავიაკომპანიას მსგავსი სერვისი არ აქვს, მაგრამ უახლესი კვლევები აჩვენებს, რომ ამერიკელ მგზავრთა 49% მზადაა, გადაიხადოს დამატებითი ფული ბილეთში, თუ თვითმფრინავში მათ სიახლოვეს არ იქნება ბავშვი.