იუსტიციის მინისტრი, თეა წულუკიანი აცხადებს, რომ არასრულწლოვანთა მართლმსაჯულების კოდექსი სამაგალითოა დასავლეთის ქვეყნებისთვის და ის "ზედმიწევნით უნდა გამოიყენონ" საქართველოში. 19 დეკემბრის მთავრობის სხდომის შემდეგ გამართულ ბრიფინგზე მინისტრმა თქვა, რომ თავად პასუხი აქვს, თუმცა საბოლოოდ ინსპექტორი გამოიძიებს, რამდენად სწორად გამოიყენეს კოდექსი 15 წლის ლუკა სირაძის გამოკითხის დროს.

"არასრულწლოვანთა მართლმსაჯულების კოდექსი არის ამ ხელისუფლების ერთ-ერთი მიღწევა, რომლის გადაღებასაც ცდილობს ბევრი დასავლეთ ევროპული ქვეყანა. სულ ახლახანს ლუქსემბურგმა დაიწყო ჩვენი მოდელის მიხედვით რეფორმა. თუ ჩვენ გვინდა, რომ ეს კოდექსი კოდექსობდეს, ის უნდა გამოიყენოს ზედმიწევნით იმ ადამიანებმა, ვინც არასრულწლოვანთა მართლმსაჯულებაში მოანაწილეობს", — ამბობს თეა წულუკიანი.

15 წლის ბიჭი, რომელიც დაკითხვის შემდეგ კორპუსიდან გადმოხტა, 17 დეკემბერს გარდაიცვალა.

გუშინ მოზარდის გარდაცვალების შემდეგ აქციები გაიმართა იაშვილის კლინიკასთანაც, სადაც მოქალაქეებმა თეთრი მიხაკები და სანთლები მიიტანეს. პარალელურად კი აქტივისტებმა შინაგან საქმეთა სამინისტროსთან და მწვანე სკოლასთან წარწერები — "ამ ცხოვრების დედაც!" დატოვეს.

მოზარდის გარდაცვალების საქმეზე გუშინვე გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

შემთხვევა 2019 წლის 11 დეკემბერს მოხდა. მანამდე მოზარდი გვიან ღამით თავისი ყოფილი სკოლის, მწვანე სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.