პარლამენტის ყოფილი თავმჯდომარე ირაკლი კობახიძე ასევე ყოფილ თავმჯდომარე დავით უსუფაშვილს ეუბნება, რომ ის ლოგიკაში ძლიერი არ არის. ასე კობახიძემ უსუფაშვილს ე.წ. გერმანულ მოდელზე კამათისას იმედის ეთერში მიმართა.

კობახიძე ამტკიცებს, რომ ეს მოდელი საქართველოს კონსტიტუციასთან თავსებადი არ არის, რასაც არ ეთანხმება უსუფაშვილი. პოლიტიკოსები ერთ ხმაში კამათობდნენ, როდესაც კობახიძემ განაცხადა:

"მე შთაბეჭდილება დამრჩა, რომ ბატონი დავითი იაზრებს, რომ ჩიხშია შესული და დემაგოგიაზე გადავიდა. თქვენ როდესაც ცდილობთ ხმის გადაფარვას, ეს იმას ნიშნავს, რომ ლოგიკაში არ ხართ ძლიერი", — განაცხადა კობახიძემ.

უსუფაშვილმა უპასუხა:

"მოდი ეს სხვამ დაასკვნას ვინ სადაა ჩიხში შესული. მე ვარ დემაგოგიაში ირაკლი შესული თუ... უკაცრავად, შენ არ შედიხარ ხოლმე არასდროს დემაგოგიაში. ახლა რაღაცა საუნდსონიკებში გადავედით უკვე, ხმაც მეცნიერებაა. რა საჭიროა ამისთანა საუბარი".

ამის შემდეგ კობახიძემ განმარტა, რომ ხალხს დარჩებოდა შთბეჭდილება, თითქოს საუბარს იმიტომ აწყვეტინებდა, რომ არგუმენტები არ ჰქონდა. რაზეც უსუფაშვილმა უპასუხა:

"ვინც არ პასუხობს იმაზე რა შთაბეჭდილება დარჩება? ჩვიდმეტჯერ დავსვი კითხვა და არ მპასუხობთ".

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. ოპოზიციური სპექტრი სამოქალაქო აქტივისტებთან ერთად მთავრობის წინააღმდეგ გაერთიანდა და პროპორციული საარჩევნო სისტემის შემოღებას ითხოვენ ე.წ. გერმანული მოდელით.