HBO-ს ყველაზე რეიტინგული და ყველა დროის საუკეთესო სერიალი ფენტეზის ჟანრში სამეფო კარის თამაშები პირველობის დაკარგვის საფრთხის წინ დგას. 6 წლის განმავლობაში ჯორჯ მარტინის ქმნილებამ მსოფლიო მასშტაბით უამრავი ფანი შეიძინა და რეკორდიც კი მოხსნა პირატულად გადმოწერილ სერიალებში. თუმცა, მას შემდეგ რაც სატელევიზიო სივრცეში გამოჩნდა სერიალი ნარკობარონი, რომელიც პაბლო ესკობარის ცხოვრებაზე გვიამბობს, სამეფო კარის თამაშებს პირველობის დაკარგვა ემუქრება.

ნიუ-იორკში გამართულ, გლობალური მედიისა და კომუნიკაციების კონფერენციაზე ნეტფლიქსის კონტენტ ოფიცერმა, ტედ სარანდოსმა აღნიშნა, რომ ნარკობარონს შეუძლია სამეფო კარის თამაშებს რეიტინგში პირველი ადგილი წაართვას. რის არგუმენტად ბოლოდროინდელი კვლევის უზუსტობა მოიყვანა, სადაც ნარკობარონი მეორე ადგილზეა. სარანდოსმა განაცხადა რომ ტრადიციული კვლევა ზუსტ შედეგს არ იძლევა.

"ჩვენ მოხარულები ვართ რეიტინგში მეორე ადგილი დავიკავეთ, მაგრამ მიგვაჩნია რომ პირველი ადგილი სხვას უჭირავს მხოლოდ იმიტომ, რომ კვლევის დროს არ ხდება ყველა მოწყობილობის შედეგის შეფასება".

მიუხედავად ამისა ნეტფლიქსი არ ასაჯაროებს საკუთარ რეიტინგს, ამიტომ რთული დასადგენია სარანდოსის პრეტენზია სიმართლეს შეესაბამება თუ არა.

ჩვენთვის უცნობია შეძლო თუ არა კოლუმბიელმა ესკობარმა ვესტეროსელი კრიმინალების დაჯაბნა, მაგრამ თამამად შეგვიძლია ვთქვათ, რომ ნარკობარონი ერთ-ერთი ყველაზე ძლიერი კონკურენტია, ვინც სამეფო კარის თამაშებთან გათანაბრება შეძლო.