შინაგან საქმეთა მინისტრის ყოფილი მოადგილე ნათია მეზვრიშვილი პრემიერ-მინისტრის აპარატის უფროსად დაინიშნა. ამის შესახებ ინფორმაცია On.ge-ს პრემიერ-მინისტრის პრესსამსახურში დაუდასტურეს.

მეზვრიშვილმა ამ თანამდებობაზე გიორგი ჭოლაძე შეცვალა, რომელმაც თანამდებობა მამუკა ბახტაძის გადადგომის შემდეგ დატოვა. რაც შეეხება ნათია მეზვრიშვილს, მან შს მინისტრის მოადგილის თანამდებობა 13 სექტემბერს დატოვა.

ნათია მეზვრიშვილმა შს მინისტრის მოადგილისა და საპარლამენტო მდივნის თანამდებობა 2017 წელს დაიკავა. 2007-2009 წლებში ნათია მეზვრიშვილი ძველი თბილისის რაიონული პროკურატურის პროკურორი იყო. 2009-2013 წლებში კი საქართველოს მთავარ პროკურატურაში სხვადასხვა თანამდებობაზე მუშაობდა, კერძოდ: საპროკურორო საქმიანობაზე ზედამხედველობის დეპარტამენტის პროკურორი, ფინანსთა სამინისტროში გამოძიების საპროცესო ხელმძღვანელობის დეპარტამენტის პროკურორი, შს სამინისტროს რეგიონულ ტერიტორიულ ორგანოებში საპროკურორო საქმიანობაზე ზედამხედველობის სამმართველოს უფროსი, სტრატეგიული განვითარების სამმართველოს უფროსი, იურიდიული სამმართველოს უფროსი. 2013 წლის დეკემბრიდან იგი საპროკურორო საქმიანობაზე ზედამხედველობისა და სტრატეგიული განვითარების დეპარტამენტის უფროსის თანამდებობას იკავებდა.