თავდაცვის სამინისტროს განცხადებით, 8 ოქტომბრის საქართველოს პარლამენტის არჩევნების დღისთვის, 1290 სამხედრო მოსამსახურე, რომლებიც ვერ ტოვებენ მუდმივი დისლოკაციის ადგილს, არჩევნებში მონაწილეობას მიიღებენ სამხედრო ნაწილებთან ახლოს განლაგებულ ჩვეულებრივ სამოქალაქო საარჩევნო უბნებზე.

უწყების ცნობით, არჩევნების დღეს, ყველა განწესის/მორიგეობის ცვლა, შესაბამისი სამხედრო ნაწილის/ქვედანაყოფის მეთაურის ან დაწესებულების/ქვედანაყოფის ხელმძღვანელის მიერ 13:00 საათამდე განხორციელდება.

თავდაცვის სამინისტრო განმარტავს, რომ განწესში მყოფ სამხედრო მოსამსახურეებს შესაძლებლობა ექნებათ ხმა მისცენ საცხოვრებელი რეგისტრაციის ადგილზე სამორიგეო საათების შესაბამისად. თავდაცვის სამინისტროს დანარჩენი სამხედრო მოსამსახურეები კი, როგორ საქართველოს სხვა მოქალაქეები, არჩევნებში მონაწილეობას მიიღებენ საცხოვრებელი რეგისტრაციის ადგილის მიხედვით.

სამინისტრო განცხადებაში წერს, რომ ზოგიერთი პოლიტიკური პარტიის მხრიდან გაკეთებული განცხადება, თითქოს სამხედრო მოსამსახურეებს არ აძლევენ ხმის მიცემის საშუალებას, ყოველგვარ საფუძველს არის მოკლებული.

ნაციონალური მოძრაობის ერთ-ერთი ლიდერის გიგა ბოკერიას მტკიცებით, ხვალ ჯარის და პოლიციის დიდ ნაწილს არჩევნებში ხმის მიცემის შესაძლებლობა არ ექნება. მისი თქმით არსებობს თავდაცვის მინისტრის ლევან იზორიას სიტყვიერი ბრძანება, რომლის მიხედვითაც ჯარი ყაზარმულ მდგომარეობაზეა გადასული და სამხედროებს საცხოვრებელი მისამართის მიხედვით არჩევანის გაკეთების შესაძლებლობა არ ექნებათ.