დეპუტატი ეკა ბესელია ამბობს, რომ ვიცე-პრემიერი, მაია ცქიტიშვილი ვერ ხვდება, ბოდიში აქვს თუ არა მოსახდელი იმის გამო, რომ მისგან პირადი ცხოვრების კადრებზე საუბარს მინისტრმა "დამღლელი" უწოდა. ეკა ბესელიას აზრით, ვიცე-პრემიერი ვერ ხვდება საკუთარ თავს "რა გაუკეთა" ამ კომენტარით.

"მე არ ვთვლი ღირსად, რომ ამის შემდეგ მასზე კომენტარი ვაკეთო. იმაზე უარესს, პოლიტიკოსი და ქალი საკუთარ თავს ვერ გაუკეთებ, ვიდრე იმ სიტყვებით და იმ კომენტარით გააკეთა, რაც გააკეთა. უკაცრავად, რომ თქვენს კითხვაზე მიწევს პასუხების გაცემა, როცა მეკითხებით ამ საქმეზე რა ხდება, აი, უკაცრავად, რომ ქალბატონი მაია ამ პასუხების გაცემის დროს მხედავს ისევ ეკრანზე. საერთოდ, სანამ პოლიტიკაში მოვიდოდა და სანამ სიზმარში ნახავდა იმ თანამდებობას, რა თანამდებობაზეც ზის, მე დღის წესრიგში მაშინაც ვიყავი", — აღნიშნა რუსთავი 2-თან საუბრისას ეკა ბესელიამ.

22 ივნისს ეკა ბესელიამ რუსთავი 2-თან საუბარში თქვა, რომ ისევ პასუხგაუცემელია კითხვები, თუ ვინ არის ფარული ვიდეოკადრების ავტორი. ბესელიას განცხადებით, მას აღარ აქვს იმედი, რომ საქმეზე გამოძიება დასრულდება. ინფრასტრუქტურის მინისტრმა, მაია ცქიტიშვილმა ჟურნალისტებთან საუბრისას თქვა, რომ ქართული ოცნებიდან წასულ დეპუტატ ეკა ბესელიას მხრიდან პირად ცხოვრებაზე საუბარი "უკვე დამღლელია". ცქიტიშვილის თქმით, ბესელიას ქმედებები არის მორიგი მცდელობა, რომ იყოს ახალი ამბების დღის წესრიგში.