საქართველოს უზენაესი სასამართლოს მოსამართლეობის კანდიდატი, ზურაბ აზნაურაშვილი ამბობს, რომ 8 ივლისს, ღირსების მარშის გამართვის დროს სახელმწიფოს მხრიდან უსაფრთხოების გარანტიები არ იყო საჭირო. კანდიდატმა ეს იმით ახსნა, რომ მარში სპონტანურად ჩატარდა.

"არ მგონია, რომ იმ კონკრეტულ შემთხვევაში რამე ორგანიზება გაეკეთებინა სახელმწიფოს და რაიმე საჭიროება იყო იმიტომ, რომ სპონტანური იყო", — განმარტა მან.

ლგბტქ ადამიანები საქართველოში მუდმივად არიან ჩაგვრის მსხვერპლი. მათ არ ეძლევათ ჰომოფობიისა და ტრანსფობიის დღის აღნიშვნის შესაძლებლობა. შინაგან საქმეთა სამინისტროსგან უსაფრთხოების გარანტიების არქონისა და თბილისის მასშტაბით მობილიზებული ძალადობრივი ჯგუფების მიუხედავად, ღირსების მარში 8 ივლისს მაინც გაიმართა.

თბილისი პრაიდის ორგანიზატორები შინაგან საქმეთა სამინისტროს შენობასთან ლგბტ დროშებითა და საპროტესტო ბანერებით მივიდნენ. აქცია-მსვლელობა შსს-სთან, დაახლოებით, ნახევარი საათი გაგრძელდა და დროზე ადრე დასრულდა, მას შემდეგ, რაც ლევან ვასაძის რადიკალთა დაჯგუფება რუსთაველის გამზირიდან სამინისტროსკენ დაიძრა.