კლუბი BASSIANI / HOROOM-ი მოუწოდებს პასუხისმგებელ პირებს, დაუყოვნებლივ აღკვეთონ მოსალოდნელი ძალადობა და უზრუნველყონ ლგბტ+ ადამიანების უსაფრთხოება, მათ შორის საჯარო მსვლელობისას. ამის შესახებ კლუბის განცხადებაშია აღნიშნული, რომელიც თბილისი პრაიდის ირგვლივ განვითარებულ მოვლენებს ეხება.

მათი თქმით, საქართველოს თითოეულ მოქალაქეს თანაბრად უნდა შეეძლოს მისთვის მინიჭებული საყოველთაო უფლებებით სარგებლობა. მათივე განცხადებით, 2013 წლის 17 მაისის ტრაგიკული მოვლენებიდან ექვსი წლის თავზე ქვიარ ადამიანები დღემდე ვერ სარგებლობენ მანიფესტაციის უფლებით.

"უკანასკნელი დღეების განმავლობაში, თბილისში სიძულვილის ჯგუფების მხრიდან არაერთი აგრესიული დამოკიდებულების მომსწრენი გავხდით, რომლებიც სიცოცხლის მოსპობით ემუქრებიან მოქალაქეებს. გამოხატული ძალადობა კიდევ ერთხელ აჩვენებს ჰომოფობიის პოლიტიკურ ხასიათს, სისტემურობასა და სიმძიმეს. ანტიდისკრიმინაციული კანონის მიღების მიუხედავად, მუქარის ფაქტებზე სათანადო და დროული სამართლებრივი რეაგირების საკითხი ისევ გამოწვევად რჩება", — ნათქვამია განცხადებაში.

განცხადებაში აღნიშნულია, რომ საზოგადოებაში არსებული მანკიერებებისა და სოციალური უთანასწორობის დასაძლევად ქმედითი ნაბიჯები უნდა გადაიდგას. მათივე თქმით, ამ ბრძოლაში ქვიარ ადამიანების პრობლემები და საჭიროებები არ უნდა იქნას უგულვებელყოფილი, მათი საკითხი კი პოლიტიკურად ინსტრუმენტალიზებული.

"მიუხედავად ჩვენი განსხვავებულობისა — იქნება ეს პოლიტიკური, იდეოლოგიური თუ სხვა, ყველაფერი უნდა გავაკეთოთ იმისთვის, რომ თავიდან ავიცილოთ საზოგადოების პოლარიზება, დაშლა და დაქუცმაცება, რადგან საერთო სიკეთისა და კეთილდღეობის მისაღწევად ჩვენი ამოსავალი წერტილი ყოველთვის იყო საზოგადოების გაერთიანება... არ დადგეთ ძალადობის მხარეს", — წერია განცხადებაში.