საქართველოს შინაგან საქმეთა მინისტრის მოადგილემ, ნათია მეზვრიშვილმა განაცხადა, რომ არჩევნების სამართლიან გარემოში ჩატარების მიზნით, საქართველოს რეგიონებში უწყებას სამართალდამცავები ჰყავს გაგზავნილი.

მისი განცხადებით, საარჩევნო უბნებზე დაფიქსირდა ადმინისტრაციული სამართალდარღვევები და დანაშაულის შემცველი ქმედებები, რაზეც დაკავებულია რამდენიმე ადამიანი:

"ადმინისტრაციული წესით დაკავებულია ხუთი ადამიანი, პოლიციისადმი წინააღმდეგობასა და წვრილმანი ხულიგნობისთვის. ხოლო, გამოძიება დაწყებულია ორ სისხლის სამართლის საქმეზე".

რაც შეეხება თალაკვაძის ბრალდებას, ენმ-ს მხარდამჭერის მხრიდან "ზუგდიდის ადუღების" გეგმაზე, აღნიშნულ ფარულ აუდიო ჩანაწერზე შსს-ს გამოძიება ჯერ არ დაუწყია. მეზვრიშვილის თქმით, პოლიციური რესურსი ამ ეტაპზე სრულად მიმართულია კონკრეტულ წერტილებში სიტუაციის განმუხტვისკენ. მეზვრიშვილი დასძენს, რომ შსს აღნიშნულის სამართლებრივ შესწავლას გეგმავს.