თიბისი ბანკის სამეთვალყურეო საბჭოს თავმჯდომარის მოადგილემ ბადრი ჯაფარიძემ სიცრუე უწოდა გავრცელებულ ინფორმაციას, რომ მათ წილების დათმობა ბიძინა ივანიშვილმა შესთავაზა და მოლაპარაკების პროცესში შინაგან საქმეთა მინისტრი გიორგი გახარიაც იყო ჩართული.

"არა, აბსოლუტური სიცრუეა, ასეთი თხოვნა არავისგან არ ყოფილა", — განაცხადა ბადრი ჯაფარიძემ.

თიბისის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.