განათლების, მეცნიერების, კულტურისა და სპორტის მინისტრთან, მიხეილ ბატიაშვილთან შეხვედრის შესახებ მხოლოდ ტელეჟურნალისტებს აცნობეს. ინფორმაცია ამის შესახებ ლიბერალმა გაავრცელა.

როგორც On.ge-ს განათლების სამინისტროს პრესსამსახურში განუმარტეს, შეხვედრა "სწრაფად" ჩაინიშნა და ინფორმირებაზე პასუხისმგებელმა პირებმა მხოლოდ ტელეჟურნალისტებს დაურეკეს. უწყებაში განმარტეს, რომ მათ სხვა მედიების ინფორმირება "დაავიწყდათ".

სამინისტროში ამბობენ, რომ მომხდარის გამო წუხან. მათი თქმით, პასუხისმგებელმა პირებმა უკვე მიიღეს საყვედური. მათივე თქმით, ონლაინ გამოცემებისა და რადიოს ჟურნალისტებს მინისტრთთან შეხვედრის საშუალება მომავალში საერთო პრესკონფერენციაზე ექნებათ.

"პარასკევიდან დაწყებული, მომავალი 3 კვირის განმავლობაში კვირაში 3-ჯერ გექნებათ მინისტრთან შეხვედრის საშუალება. გაძლევთ გარანტიას, რომ ყველა მიმართულებაზე, რომელიც დღეს დააანონსა მინისტრმა თქვენ მიიღეთ დეტალურ ინფორმაციას", — განაცხადეს სამინისტროს პრესსამსახურში.

პრესრელიზში, რომელიც მინისტრთან შეხვედრის შემდეგ სხვა მედიებს დაუგზავნეს ნათქვამია, რომ ბატიაშვილმა ჟურნალისტებთან განათლების რეფორმის საკითხებზე ისაუბრა.