საპარლამენტო უმრავლესობის წევრი, ზაქარია ქუცნაშვილი ამბობს, რომ ეკა ბესელიას კომიტეტის თავმჯდომარის თანამდებობიდან გადადგომის შესახებ ბიძინა ივანიშვილთან შეთანხმებული ჰქონდა. ამის შესახებ ქუცნაშვილმა ივანიშვილის მიერ ჩანიშნული შეხვედრის დასრულების შემდეგ განაცხადა.

"როგორც პარლამენტის თავმჯდომარემ ბრძანა, ეკა ბესელიას გადადგომაზე გადაწყვეტილება შეთანხმებული ჰქონდა აგვისტოს თვეში. ვერ გეტყვით სხვას, ეკა [ბესელია] არ ესწრებოდა შეხვედრას მაგრამ პარლამენტის თავმჯდომარემ ბრძანა ღიად, საჯაროდ, რომ ეს საკითხი მასთან შეთანხმებული იყო. სხვა თავმჯდომარეს ჰკითხეთ", — განაცხადა ქუცნაშვილმა.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.