რუსული როკ ჯგუფი Звери პროექტ Check in Georgia–ს ფარგლებში საქართველოში დღეს უნდა ჩამოსულიყო, ხვალ, 29 აგვისტოს კი, ბათუმის კორტებზე კონცერტი უნდა გაემართა, თუმცა, ღონისძიება ჩაიშალა.

კონცერტის ორგანიზატორი ქართული კომპანია GTS Group აცხადებს, რომ ბენდმა საქართველოში ჩამოსვლა "ვერ მოახერხა":

"მიუხედავად იმისა, რომ ეს ყველაფერი მოხდა GTS Group- ისგან დამოუკიდებლად, ჩვენ ამ ეტაპზე ვიცავთ კონფიდენციალურობას და არ ვასაჯაროებთ არ ჩამოსვლის ნამდვილ მიზეზს. რაც შეეხება ბილეთებს, ამ ეტაპზე ბილეთებს ყიდვა შეჩერებულია და თანხის დაბრუნებას ეტაპობრივად შევასრულებთ. ასევე გვინდა ჩვენი ორგანიზაციის სახელით ყველა მსმენელს და ჩვენს პარტნიორებს მოვუხადოთ ბოდიში".

თავის მხრივ, რუსულმა ბენდმა ფეისბუკ გვერდზე გამოაქვეყნა განცხადება, სადაც მსმენელს ბოდიშს უხდის კონცერტის გაუქმების გამო. მათი თქმით, GTS Group–მა არ შეასრულა ნაკისრი ვალდებულებები და მუსიკოსებს დათქმულ დროს არ გადაურიცხა ჰონორარი, რაც გახდა კონცერტის ჩაშლის მიზეზი.

"ვიმედოვნებთ, რომ ჩვენ ქართველი მსმენელის წინაშე 2017 წლის ტურნეს ფარგლებში მაინც წარვსდგებით, ველოდებით შემოთავაზებებს სხვა პრომოუტერებისგან", – აცხადებს ზვერი.

ზვერი 2001 წელს დაარსებული რუსული მუსიკალური ჯგუფია. მის შემოქმედებიდან ყველაზე პოპულარული ქართველი მსმენელისათვის სიმღერა До скорой встречи-ია. ბენდი რუსული MTV-ის ლაურეატია, ასევე რეკორდსმენია Муз-ТВ-ის პრემიების მოგების ოდენობით .

პროექტ Check in Georgia-ს ფარგლებში საქართველოს უკვე ეწვია ეროს რამაზოტი, რობი უილიამსი, Maroon 5 და ხოსე კარერასი. ღონისძიებები აპრილში დაიწყო და მთელი წლის განმავლობაში თბილისსა და ქვეყნის სხვადასხვა ქალაქში გაიმართება.

პროექტი ასევე მოიცავს ქართველი და უცხოელი შემსრულებლების მონაწილეობით ქვეყნის 19 ქალაქში დაგეგმილ კონცერტებსა და 35 ფესტივალს - თეატრალური ფესტივალები, კინოფესტივალები, მუსიკალური ფესტივალები, ანიმაციური ფილმების ფესტივალები და სხვა. თავდაპირველად მთავრობამ განაცხადა, რომ პროექტი 30 მილიონ ლარამდე დაჯდებოდა, შემდეგ კი პროექტში მონაწილეობის სურვილი სხვადასხვა კომპანიამაც გამოთქვა.