კუბის მოსახლეობას 3G მობილურ ინტერნეტზე წვდომა ექნება. როგორც BBC წერს, პროვაიდერი კომპანია Etecsa-ს მოქალაქეებს მომსახურების მიღებას ამ კვირიდან სთავაზობს.

აქამდე მოსახლეობა ძირითადად დამოკიდებული იყო Wi-Fi-სა და ინტერნეტკაფეებზე, ხოლო 3G მომსახურება ხელმისაწვდომი იყო მხოლოდ სახელმწიფო სტრუქტურებში მომუშავე ჟურნალისტებისთვისა და უცხოური კომპანიებისთვის. მიუხედავად იმისა, რომ მობილურ ინტერნეტზე შეზღუდვა აღარ იქნება, მოსახლეობის დიდი ნაწილი მაინც ვერ შეძლებს მისით სარგებლობას.

Etecsa-ს პაკეტების ღირებულება ბევრისთვის ძვირი იქნება. 600 მეგაბაიტი ეღირება 7 კუბური პესო ($7), ხოლო 4 გიგაბაიტი 30 კუბური პესო ($30) ეღირება მაშინ, როცა 11,2 მილიონი ადამიანის ყოველთვიური საშუალო შემოსავალი 30 დოლარია.

კუბაში ინტერნეტი მკაცრად კონტროლდებადია. ჯერ კიდევ ხუთი წლის წინ ის ხელმისაწვდომი იყო ტურისტული სასტუმროებისთვისა და სახელმწიფო კლუბებისთვის. 2013 წლიდან გაიხსნა ინტერნეტ კაფეები. ერთი წლის შემდეგ კი ხელისუფლებამ უფლება მისცა მოსახლეობას მობილურით წვდომა ჰქონოდათ ადგილობრივ სახელმწიფო მეილ Nauta-ზე. Wi-Fi-ს პირველი ჰოტსპოტი კი 2015 წელს კულტურულ ცენტრში გაიხსნა, ამას კი სხვა საზოგადოებრივი ადგილები მოყვა.