დანაშაულის პრევენციის ცენტრის ყოფილი თანამშრომლის, თამაზ ახობაძის თქმით, დღეს, 30 ნოემბერს მისი სამსახურიდან გათავისუფლების საქმეზე შეხვედრაზე დაიბარეს. ის ამბობს, რომ დანაშაულის პრევენციის ცენტრისა და აღსრულების ეროვნული ბიუროს წარმომადგენლები ესწრებოდნენ. ახობაძემ შეხვედრის შემდეგ ორშაბათისთვის დაანონსებული შიმშილობა გადადო.

ახობაძე ფეისბუქანგარიშზე წერს, რომ ორივე მხარის პოზიციები უცვლელია. კერძოდ, დანაშაულის პრევენციის ცენტრი ახობაძეს მხოლოდ განაცდურს სთავაზობს, ის კი სამსახურში ვერ აღდგენის კომპენსაციასაც ითხოვს. ის ამბობს, რომ დანაშაულის პრევენციის ცენტრმა მოთხოვნაზე პასუხისთვის 10 დღის ვადა მოითხოვა.

On.ge ცდილობს დანაშაულის პრევენციის ცენტრთან დაკავშირებას, თუმცა ზარებს ამ დრომდე არ პასუხობენ.

ახობაძემ გუშინ, 29 ნოემბერს განაცხადა, რომ მის გათავისუფლებასთან დაკავშირებით დანაშაულის პრევენციის ცენტრმა "დამცინავი" და "ამაზრზენი" პასუხი გასცა. ახობაძის თქმით, თუ სახელმწიფოს მხრიდან კონკრეტულ ქმედებებს ვერ დაინახავს, ორშაბათიდან იუსტიციის სამინისტროსთან შიმშილობას დაიწყებს.

როგორც დანაშაულის პრევენციის ცენტრის ყოფილი თანამშრომელმა თქვა, წერილი მის დისკრედიტაციას ემსახურებოდა. მისი თქმით, განცხადებაში წერია, რომ ახობაძის აღდგნა განსაზღვრულია ტოლფას თანამდებობაზე, რომლის საკვალიფიკაციო პირობებს ის ვერ აკმაყოფილებდა.

სოციალურ ქსელში ახობაძემ განცხადებიდან რამდენიმე ამონარიდიც გამოაქვეყნა:

  • კითხვაზე, თუ როგორ უნდა მოიქცეს მოქალაქე, როცა სახელმწიფო სასამართლო გადაწყვეტილებას არ აღასრულებს, ახობაძის თქმით, ცენტრი ასე პასუხობს: "ამ კითხვაზე პასუხის გაცემა და სამართლებრივი პროცედურების განმარტება არ უნდა წარმოადგენდეს კორესპონდენციის ავტორის ნამდვილ მიზანს";
  • დანაშაულის პრევენციის ცენტრის ყოფილი თანამშრომელი წერს, რომ გამოგზავნილი წერილის მიხედვით, ის ისე ცდილობს ვითარების წარმოჩენას, თითქოს არსებობს აღსასრულებელი გადაწყვეტილება და სახელმწიფო უბრალოდ უმიზეზოდ არ მოქმედებს;

ახობაძის საქმე

2014 წელს ანა სუბელიანი და თამაზ ახობაძე დანაშაულის პრევენციის ცენტრიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4-წლიანი იძულებითი განაცდურის ანაზღაურება დაეკისრა.

მოგვიანებით, ცნობილი გახდა, რომ გადაწყვეტილება, რომლითაც ახობაძის თანამდებობაზე აღდგენას შეეხებოდა მის სამუშაო ადგილზე დანიშნულმა პირმა გაასაჩივრა და სააპელაციო სასამართლომ დააკმაყოფილა კიდეც.

23 ივლისს ცნობილი გახდა, რომ უზენაესმა სასამართლომ დააკმაყოფილა თამაზ ახობაძის საჩივარი და მიიჩნია, რომ მისი თანამდებობაზე აღდგენის განმხილველ საქმეებში მის ყოფილ სამუშაო ადგილზე დასაქმებული პირი არ უნდა ყოფილიყო ჩართული.