შინაგან საქმეთა სამინისტროს ინფორმაციით, გურჯაანის სოფელ ჩუმლაყში არაფხიზელ მდგომარეობაში მყოფმა პირმა ე.წ. სასიგნალო იარაღიდან გაისროლა. უწყების ცნობით, გასროლა #19 უბნიდან მოშორებით მოხდა და არჩევნების პროცესთან არაა დაკავშირებული.

შსს-ს ინფორმაციით, გამოძიება საქმეზე სისხლის სამართლის კოდექსის 236-ე მუხლითაა დაწყებული, რაც ცეცხლსასროლი იარაღის შეძენა/შენახვა/ტარებას გულისხმობს.

არასამთავრობო ორგანიზაცია საქართველოს პარლამენტართა საზოგადოების დამკვირვებელმა, დავით სააკაშვილმა TV პირველს განუცხადა, რომ უცნობმა პირმა გაისროლა არა საარჩევნო უბნის მოშორებით, არამედ უშუალოდ უბნის წინ. არასამთავრობოს წარმომადგენლის თქმით, მთელი დღის განმავლობაში გადაადგილებისას გაურკვეველი მანქანები დაყვებოდნენ და შემთხვევა მას შემდეგ მოხდა, რაც მეცხრამეტე უბანზე გარკვეული დროით გაჩერდნენ.