რუსეთის საზღვართან 100-ზე მეტი ვეშაპი ე.წ. "ვეშაპების ციხეში" უკანონოდ არის მოთავსებული. ლოკალური მედიის განცხადებით, სულ მალე მათ ჩინურ გასართობ პარკებსა და აკვარიუმებს მიჰყიდიან.

ფოტო: Masha Netrebenko/Facebook

CBS News-ის ცნობით, ქალაქ ნახოდკასთან ახლოს ვეშაპები ივლისიდან მოყოლებული იმყოფებიან. მათი საცხოვრებელი პირობები არადამაკმაყოფილებელია. წყალი საკმარისად ღრმა არაა, წყალქვეშ კი ბადეებით შექმნილი ბარიერებია. "ვეშაპების ციხეს" შეიარაღებული პირები იცავენ.

გარეული ვეშაპების შეპყრობა მხოლოდ სამეცნიერო და საგანმანათლებლო მიზნით შეიძლება. კომერციული მიზნებით კი მათი დაჭერა 1982 წლიდან მკაცრადაა აკრძალული.

გარემოსდამცველი ორგანიზაცია Greenpeace Russia ამგვარ პირობებში ვეშაპების გაჩერებას წამებას ადარებს.

ჩინეთის შავ ბაზარზე თითოეული ვეშაპის ღირებულება $6 მილიონია. მიუხედავად იმისა, რომ ჩინეთში უკვე 60-ზე მეტი აკვარიუმია, მოთხოვნა ამ ტიპის გართობაზე ყოველწლიურად იზრდება.

"ამ ტემპებით ვეშაპების დაჭერით მთელ სახეობას საფრთხეში ვაგდებთ", - აცხადებს Greenpeace-ის მკვლევარი ოგანეს ტარგულიანი, - "ყოველი დაჭერილი ვეშაპის მიღმა კი ერთი მოკლული შეგვიძლია ვიგულისხმოთ".

ქვემოთ მოცემულ ვიდეოში ჩანს, როგორ ამოჰყავთ ვეშაპი ამწეთი, რათა ის გაურკვეველი მიმართულებით ტრანსპორტირებისთვის მოამზადონ.

ორკა ვეშაპების რაოდენობა კამჩატკის რეგიონის მახლობლად კრიტიკულადაა შემცირებული და ეს სახეობა გადაშენების პირასაა.

ეს ვეშაპებით უკანონო ვაჭრობის პირველი შემთხვევა არაა. 2013 წლიდან 2018 წლამდე რუსეთმა ჩინეთს მინიმუმ 15 ორკა მიჰყიდა.