დღეს, 28 ოქტომბერს, საქართველოში საპრეზიდენტო არჩევნები იმართება. ფეისბუქზე შესულ მომხმარებლებს დღეს სოციალური ქსელისგან სპეციალური მესიჯი დახვდათ, სადაც პლატფორმა მათ არჩევნებთან დაკავშირებული პოსტის გაზიარებისკენ მოუწოდებდა.

"დღეს არჩევნების დღეა. აჩვენე შენს მეგობრებს, როგორ ხარ ჩართული პროცესში", - წერია ფეისბუქის შეტყობინებაში.

ფუნქციის საშუალებით, მომხმარებლებს შეუძლიათ მეგობრებს გაუზიარონ საკუთარი ჩართულობის შესახებ ინფორმაცია.

რაც შეეხება მეორე ღილაკს: ნახე არჩევნების შესახებ ინფორმაცია [See Election Info], ის ცესკოს საიტზე გადადის.

შეგიძლიათ არჩევნებში ხმის მიცემის შემდეგ, თქვენს ფეისბუქის პროფილის ფოტოზე On.ge-ის ჩარჩოც დაიყენოთ.

დღეს მოქალაქეები საქართველოს მეხუთე პრეზიდენტს ირჩევენ. შემდეგი საპრეზიდენტო არჩევნები პირდაპირი არჩევის წესით აღარ გაიმართება.

ცენტრალური საარჩევნო კომისიის ინფორმაციით, არჩევნები 3 703 უბანზე ტარდება. მათ შორის, 55 საზღვარგარეთ, 11 კი საგამონაკლისო წესით შექმნილი უბანია.

ცესკოში ამბობენ, რომ ამომრჩეველთა საერთო რაოდენობა 3 518 877 ადამიანს შეადგენს, რომელშიც შედის საზღვარგარეთ რეგისტრირებული 14 795 მოქალაქე. ცესკოს ინფორმაციით, ამომრჩეველთა აქტივობა 12 საათისთვის 15,95%-ია