საქართველოს ყოფილმა პრემიერ-მინისტრმა, გიორგი კვირიკაშვილმა არჩევნებზე ხმის მიცემის შემდეგ განაცხადა, რომ პოლიტიკაში დაბრუნებას აღარ აპირებს. როგორც კვირიკაშვილმა ჟურნალისტებს უთხრა, მას საინტერესო საქმე აქვს.

ხმის მიცემის შემდეგ კვირიკაშვილმა რუსთავი 2-ზე გასულ რეპორტაჟზე ისაუბრა, სადაც მის აგარაკზე იყო საუბარი. ყოფილმა პრემიერმა თქვა, რომ მისგან ინფორმაცია ჟურნალისტს არ მიუღია და არხზე მცდარი ინფორმაცია გავრცელდა.

ქართული ოცნების მმართველობის პერიოდში მესამე პრემიერ-მინისტრი, გიორგი კვირიკაშვილი 2018 წლის 13 ივნისს გადადგა. კვირიკაშვილის ადგილი კი იმ დროს ფინანსთა მინისტრმა მამუკა ბახტაძემ დაიკავა.

5 ივლისს კვირიკაშვილმა პარტია ქართული ოცნებაც დატოვა. ჟურნალისტებთან საუბრის დროს თბილისის მერმა და ქართული ოცნების გენერალურმა მდივანმა კახა კალაძემ განაცხადა, რომ გიორგი კვირიკაშვილმა პარტია საკუთარი სურვილით განცხადების საფუძველზე დატოვა.

2018 წლის სექტემბერში კვირიკაშვილი EBRD-ის საერთაშორისო მრჩეველი გახდა.