საქართველოს სახალხო დამცველმა დანაშაულის პრევენციის ცენტრს გათავისუფლებული თანამშრომლების, თამაზ ახობაძისა და ანა სუბელიანის აღდგენის რეკომენდაციით მიმართა. ომბუსმენმა მიიჩნია, რომ ცენტრი გათავისუფლებული თანამშრომლების კანონიერ უფლებებს არღვევს.

სახალხო დამცველს საქმის მოკვლევის მოთხოვნით, სუბელიანმა და ახობაძემ მას შემდეგ მიმართეს, რაც ცენტრმა სასმართლოს მიერ მიღებული გადაწყვეტილება არ შეასრულა და ისინი სამსახურში არ აღადგინა.

On.ge-მ სცადა იმის გარკვევა აპირებს თუ არა ცენტრი ომბუდსმენის რეკომენდაციის შესრულებას, თუმცა პრესსამახურში ჩვენს ზარებს არ პასუხობენ.

სუბელიანის და ახობაძის საქმე

2014 წელს ანა სუბელიანი და თამაზ ახობაძე დანაშაულის პრევენციის ცენტრიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4-წლიანი იძულებითი განაცდურის ანაზღაურება დაეკისრა.

მოგვიანებით, ცნობილი გახდა, რომ გადაწყვეტილება, რომლითაც ახობაძის თანამდებობაზე აღდგენას შეეხებოდა მის სამუშაო ადგილზე დანიშნულმა პირმა გაასაჩივრა და სააპელაციო სასამართლომ დააკმაყოფილა კიდეც.

23 ივლისს ცნობილი გახდა, რომ უზენაესმა სასამართლომ დააკმაყოფილა თამაზ ახობაძის საჩივარი და მიიჩნია, რომ მისი თანამდებობაზე აღდგენის განმხილველ საქმეებში მის ყოფილ სამუშაო ადგილზე დასაქმებული პირი არ უნდა ყოფილიყო ჩართული.