არასამთავრობო ორგანიზაცია სამართლიანი არჩევნების დამკვირვებლის ცნობით, საქართველოს პრეზიდენტობის კანდიდატმა, შალვა ნათელაშვილმა არაპირდაპირი გზით, კერძოდ პარტიის აქტივისტის დახმარებით, ეკლესიასთან მოწყალების მთხოვნელებს 150 ლარი გადასცა. სამართლიანი არჩევნების ცნობით, შემთხვევა 21 სექტემბერს, ქუთაისში გელათის სამონასტრო კომპლექსში ამომრჩეველთან შეხვედრის დროს მოხდა.

სამართლიანმა არჩევნებმა განცხადებით მიმართა სახელმწიფო აუდიტის სამსახურს, შეისწავლოს ამომრჩევლისთვის ფულის გადაცემის ფაქტი, ვინაიდან ეს შესაძლოა წარმოადგენდეს ამომრჩევლის მოსყიდვას.

ლეიბორისტული პარტიის პრესსამსახურში On.ge-ს განუცხადეს, რომ გავრცელებული ინფორმაცია სიცრუეა და მოქალაქისთვის თანხის გადაცემის ფაქტს, შალვა ნათელაშვილის მხრიდან ადგილი არ ჰქონია.

"სრული სიცრუეა. ჩვენი ინფორმაციით, პარტიის აქტივისტი დაეხმარა მოწყალების მთხოვნელს არა 150, არამედ 5 ლარით. დახმარების გაწევა ინდივიდუალურია და ამაზე შალვა ნათელაშვილი ვერ აგებს პასუხს", — აცხადებენ პარტიის პრესსამსახურში.

მოქალაქეთა პოლიტიკური გაერთიანების შესახებ საქართველოს ორგანული კანონის 25-ე მუხლით მე-16 ქვეპუნტის თანახმად, პარტიას ეკრძალება კანდიდატის, წარმომადგენლის ან სხვა პირის მეშვეობით, პირდაპირ ან არაპირდაპირ, საქართველოს მოქალაქისათვის ფულადი სახსრების, საჩუქრებისა და სხვა მატერიალური ან არამატერიალურ ფასეულობათა გადაცემა.