საერთაშორისო გამჭვირვალობა საქართველოს 2018 წლის კვლევის მიხედვით, საჯარო სექტორში მნიშვნელოვან პოზიციებზე ბიძინა ივანიშვილის კომპანიებიდან წამოსული კადრების დანიშვნის ტენდენცია გრძელდება. იდენტური კვლევა ორგანიზაციამ თანამდებობის პირების ქონებრივ დეკლარაციებზე დაყრდნობით 2015 წელსაც გამოაქვეყნა.

ამ კვლევის მიხედვით, "სულ მცირე 38 თანამდებობის პირი წარსულში მუშაობდა ბიძინა ივანიშვილთან დაკავშირებულ რომელიმე კომპანიაში," ხოლო "14 თანამდებობის პირის შემთხვევაში ამ კომპანიებში მათი ოჯახის წევრები იყვნენ დასაქმებულნი".

კვლევის ავტორებს მიაჩნიათ, რომ ამაში რაიმე კანონდარღვევა არ არის, თუმცა ივანიშვილის კომპანიების თანამშრომლების მაღალ თანამდებობებზე გადანაცვლების ტენდენცია "ეჭვქვეშ აყენებს საჯარო მოხელეთა შერჩევის მერიტოკრატიულ პრინციპს და კიდევ უფრო ამყარებს ვარაუდს ხელისუფლებაზე ივანიშვილის არაფორმალური გავლენის შესახებ".

2018 წლის 5 ოქტომბერს გამოქვეყნებული კვლევის მიზანი, საერთაშორისო გამჭვირვალობა საქართველოს განმარტებით, 2015 წელს გამოქვეყნებული მასალის განახლებაა. ამჯერად კვლევა 40-მდე თანამდებობის პირს შეეხო.

ორგანიზაციის მიერ გამოქვეყნებული ინფორმაციიდან ირკვევა, რომ 2015 წლიდან დღემდე, სულ მცირე 17 ახალი შემთხვევა გამოიკვეთა, როდესაც თანამდებობაზე ივანიშვილის კომპანიებიდან წამოსული კადრი დაინიშნა/აირჩა; კიდევ 9 შემთხვევაში ასეთი პირები საჯარო სექტორში ახალ თანამდებობაზე დაინიშნენ/აირჩნენ. ასევე, სულ მცირე 9 ახალ შემთხვევაში, თანამდებობები ისეთმა პირებმა დაიკავეს, ვისი ოჯახის წევრებიც ივანიშვილის კომპანიებში არიან დასაქმებულები.

ამ ადამიანებს შორის არიან:

  • საკანონმდებლო ხელისუფლების წარმომადგენლები: დავით მათიკაშვილი, ენძელა მაჭავარიანი, ირაკლი ბერაია;
  • უზენაესი სასამართლოს მოსამართლე მზია თოდუა;
  • აღმასრულებელი ხელისუფლებისა და ადგილობრივი თვითმმართველობის წარმომადგენლები;
  • საზოგადოებრივი მაუწყებლის დირექტორი, ვასილ მაღლაფერიძე და სხვა თანამშრომლები.

ფოტო: საერთაშორისო გამჭვირვალობა საქართველო