ორგანიზაცია სამართლიანი არჩევნების (ISFED) იურისტი ნინო რიჟამაძე On.ge-სთან ინტერვიუში აცხადებს, რომ 14 აგვისტოს ისინი ცენტრალურ საარჩევნო კომისიას მიმართავენ იმ დარღვევისთვის, რომელსაც საარჩევნო კოდექსი ითვალისწინებს.

საქმე ეხება ლადო ბედუკაძის და ნიკოლოზ ხაჩიშვილის პარტია ცენტრისტების წინასაარჩევნო უფასო პოლიტიკურ რეკლამას, რომელიც საზოგადოებრივი მაუწყებლის ეთერით გავიდა და ასევე განთავსებულია ინტერნეტ სივრცეში.

იურისტი განმარტავს, რომ დაირღვა საარჩევნო კოდექსის 45-ე მუხლის მე-3 პუნქტი. იგი კრძალავს პოლიტიკური პარტიის მიერ წინასაარჩევნო კამპანიისას ისეთი რეკლამების გამოყენებას, რომელიც საფრთხეს უქმნის საქართველოს ტერიტორიულ მთლიანობას, მოწოდებულია არსებული პოლიტიკური წესწყობილების დამხობისკენ და ლახავს მის სუვერენიტეტს:

"პარტიამ ჩაიდინა ეს კონკრეტული სამართალდარღვევა. მისი რეკლამის შინაარსი პირდაპირ უქმნის საფრთხეს საქართველოს ტერიტორიულ მთლიანობას, სუვერენიტეტსა და დამოუკიდებლობას. ამ შემთხვევაში ცესკომ უნდა იმსჯელოს და დაავალოს პარტიას ამოიღოს მისი სარეკლამო რგოლი საჯარო სივრციდან და დაჯარიმდეს 2000 ლარის ოდენობით".

მისივე თქმით, კოდექსის ეს ნაწილი სავალდებულო პირობას უყენებს პარტიებს, ვიდრე ისინი წინასაარჩევნო რეკლამებს გამოაქვეყნებენ.

სამართლიანი არჩევნების იურისტი მაუწყებლის როლის შესახებაც საუბრობს და ამბობს, რომ საარჩევნო კოდექსით მაუწყებელმა თანაბრად, არადისკრიმინაციულად უნდა გაუშვას თავის ეთერში ცესკოში რეგისტრირებული საარჩევნო სუბიექტების პარტიების წინასაარჩევნო რეკლამა.

"მაუწყებლობის შესახებ კანონის 63-ე მუხლის მე-3 პუნქტის თანახმად, საზოგადოებრივ მაუწყებელს არ აქვს უფლება შეამოწმოს ამ პოლიტიკური რეკლამის შინაარსი."

"მაუწყებელი პასუხს არ აგებს წინასაარჩევნო და სოციალური რეკლამების შინაარსზე. წინასაარჩევნო და სოციალური რეკლამების შინაარსზე პასუხისმგებლობა საქართველოს კანონმდებლობით დადგენილი წესით ეკისრება შესაბამისი რეკლამის დამკვეთს", - წერია მაუწყებლის შესახებ კანონში.

13 აგვისტოს პოლიტიკური გაერთიანება ცენტრისტები ხაჩიშვილი - ბედუკაძე საარჩევნო რეკლამა გავრცელდა. პარტიის დაპირებებია: რუსული პენსია - 400 ლარი, მივიღებთ ორმაგი მოქალაქეობის კანონს და დავაკანონებთ რუსულ სამხედრო ბაზებს.

ასევე, საზოგადოებრივი მაუწყებლის პირველადი პროფკავშირი განცხადებას ავრცელებს, რომ ისინი ემიჯნებიან მაუწყებლის ეთერით გასულ რუსულ პროპაგანდას და მზად არიან საკუთარი ხელფასიდან გადაიხადონ სახელმწიფოს მიერ დაკისრებული ჯარიმა ანტიეროვნული კლიპის არ გაშვების სანაცვლოდ.

ცენტრისტების უფასო საარჩევნო რეკლამასთან და მის შინაარსთან დაკავშირებით, მარეგულირებელი კომისია 15 აგვისტოს გააკეთებს განცხადებას.