შინაგან საქმეთა მინისტრის მოადგილემ, ნათია მეზვრიშვილმა განაცხადა, რომ კანაფის დათესვა-მოყვანის ლიცენზიის პირობების დარღვევაზე მაღალი ფინანსური სანქციები და სისხლის სამართლის პასუხისმგებლობა იქნება.

"ლიცენზირების პირობა იქნება საკმაოდ მკაცრი მოთხოვნა, რომელიც ლიცენზიის მიღების სურვილის მქონე იურიდიულმა პირმა აუცილებლად უნდა დააკმაყოფილოს. ლიცენზიის პირობების შესრულება, იმდენად მკაცრად იქნება გაკონტროლებული, რომ გამოყენებული იქნება არა მარტო მაღალი ფინანსური სანქციები პირობების დარღვევაზე, არამედ ცალკეულ საკითხებზე გათვალისწინებული იქნება სისხლის სამართლის პასუხისმგებლობა" - განაცხადა მეზვრიშვილმა.

შინაგან საქმეთა სამინისტრომ მარიხუანის მოხმარებისა და სამედიცინო მიზნით ექსპორტზე გასატანად კანაფის კულტივაციის რეგულირებისთვის ახალი კანონპროექტი შექმნა. კანაფის მოყვანა-წარმოებისთვის საჭირო რეგულაციებს სპეციალური სააგენტო გასცემს.

კანონპროექტის მიხედვით, კანაფის კონტროლის სფეროში საქმიანობის განხორციელებისთვის 10 ტიპის ლიცენზია გაიცემა. სალიცენზიო მოსაკრებელი ლიცენზიის ყველა შემთხვევაში 25 000 ლარი იქნება. სალიცენზიო მოსაკრებელი ლიცენზიაზე განაცხადის გაკეთების წინაპირობაა. აუქციონის მონაწილეებს ეს თანხა უკან არ დაუბრუნდებათ. ლიცენზიისთვის თანხის ოდენობა კი გარემოს დაცვისა და სოფლის მეურნეობის სამინისტროს განმარტებით ჯერ განსაზღვრული არ არის.

ამავე თემაზე: