დანაშაულის პრევენციის ცენტრიდან გათავისუფლებული თამაზ ახობაძე სამსახურში მივიდა და სამსახურში აღდგენას ითხოვს. როგორც ახობაძემ On.ge-ს უთხრა, მას ცენტრის დირექტორთან გასაუბრება სურს, თუ რატომ არ სრულდება უზენაესი სასამართლოს გადაწყვეტილება.

ახობაძის თქმით, უკვე რამდენიმე საათია დანაშაულის პრევენციის ცენტრის შენობასთან დგას, თუმცა მასთან ჯერ არავინ გამოსულა და დაცვაც შენობაში შესვლის უფლებას არ აძლევს.

"არაფერს მეუბნებიან, დიდი ალბათობით არ აპირებენ გამოსვლას", - ამბობს ახობაძე.

ახობაძის განმარტებით, აღსრულების ეროვნულმა ბიურომ დანაშაულის პრევენციის ცენტრს უზენაესი სასამართლოს გადაწყვეტილების აღსრულების შესახებ ინფორმაცია უკვე მიაწოდა, თუმცა "ცენტრი არაფერს აკეთებს":

"რაც იმას ნიშნავს, რომ არ აქვს ბერკეტი, რომ აღასრულოს ან არ აკეთებს, მეორე ვარიანტი უფრო რეალურია".

როგორც ახობაძე ამბობს, დანაშაულის პრევენციის ცენტრთან დღის ბოლომდე იდგება.

ახობაძის საქმე

2014 წელს ანა სუბელიანი და თამაზ ახობაძე დანაშაულის პრევენციის ცენტრიდან გაათავისუფლეს. ისინი გათავისუფლებას მინისტრის, თეა წულუკიანის პირად გადაწყვეტილებას უკავშირებდნენ, რადგან მათ ფეისბუკზე გააპროტესტეს დანაშაულის პრევენციის ცენტრის, დავით მაისურაძის, გათავისუფლება. სუბელიანმა და ახობაძემ სსიპ-ს, დანაშაულის პრევენციის ცენტრს, სააპელაციო სასამართლოში დავა 2017 წლის 9 მარტს მოუგეს.

დანაშაულის პრევენციის ცენტრმა აღნიშნული გადაწყვეტილება გაასაჩივრა უზენაეს სასამართლოში, თუმცა, უმაღლესმა ინსტანციამ 2017 წლის 18 სექტემბერს დაუშვებლად სცნო საკასაციო საჩივარი და ძალაში დატოვა სააპელაციო სასამართლოს გადაწყვეტილება, რითაც უწყებას მათი სამსახურში აღდგენა და თითქმის 4-წლიანი იძულებითი განაცდურის ანაზღაურება დაეკისრა.

მოგვიანებით, ცნობილი გახდა, რომ გადაწყვეტილება, რომლითაც ახობაძის თანამდებობაზე აღდგენას შეეხებოდა მის სამუშაო ადგილზე დანიშნულმა პირმა გაასაჩივრა და სააპელაციო სასამართლომ დააკმაყოფილა კიდეც.

23 ივლისს ცნობილი გახდა, რომ უზენაესმა სასამართლომ დააკმაყოფილა თამაზ ახობაძის საჩივარი და მიიჩნია, რომ მისი თანამდებობაზე აღდგენის განმხილველ საქმეებში მის ყოფილ სამუშაო ადგილზე დასაქმებული პირი არ უნდა ყოფილიყო ჩართული.