პანამის დროშის ქვეშ მცურავი გემი Pantelena, რომლის ბორტზეც 17 ქართველი იყო, 14 აგვისტოს შემდეგ კონტაქტი ვეღარ მყარდება. გემით ნავთობი გადაჰქონდათ. ამის შესახებ ინფორმაციას საქართველოს საგარეო საქმეთა სამინისტრო ავრცელებს.

"ბოლო კონტაქტი დაფიქსირდა აფრიკის დასავლეთ სანაპიროზე, გვინეის ყურეში. გემთმფლობელი ბერძნული კომპანია Lotus Shipping აწარმოებს მოძიების სამუშაოებს", - აღნიშნულია განცხადებაში.

ამავე განცხადების მიხედვით, საგარეო საქმეთა სამინისტრო ეკონომიკისა და მდგრადი განვითარების სამინისტროს საზღვაო ტრანსპორტის სააგენტოსთან ერთად მუშაობს გემთმფლობელ კომპანიასთან ვითარების გარკვევის მიზნით.

"ასევე, აქტიურად ვმუშაობთ პანამის დროშის ორგანიზაციასთან. საქმეში ჩართულია როგორც რეგიონის საზღვაო სამხედრო ძალები ასევე, გაერთიანებული სამეფოს საზღვაო ცენტრი UKMTO", - ნათქვამია გავრცელებულ განცხადებაში.