ლეიბორისტული პარტიის პრეზიდენტობის კანდიდატი, შალვა ნათელაშვილი ამბობს, რომ ტაქსების რეგულაციასთან დაკავშირებულ გადაწყვეტილებას სასამართლოში გაასაჩივრებს. ამის შესახებ ნათელაშვილმა დღეს გამართულ ბრიფინგზე ისაუბრა. მისი თქმით, აღნიშნული ცვლილება მსხვილ კომპანიებს შექმნის და ხალხს ქუჩაში დატოვებს.

როგორც პარტიის წევრმა, გიორგი გუგავამ On.ge-ს განუმარტა, სასამართლოში სარჩელი ტაქსის მძღოლების სახელით შევა, ლეიბორისტული პარტია კი სამართლებრივ ნაწილს უზრუნველყოფს.

"რამდენიმე ფორმალური მოსარჩელე იქნება, თუმცა ეს შეეხება ასიათასობით ადამიანის ბედს", - აღნიშნა გუგავამ.

პირველი ნოემბრიდან რეგისტრაციის გავლის გარეშე ტაქსით მომსახურება უნებართვო საქმიანობად ჩაითვლება და 200 ლარით დაჯარიმებას გამოიწვევს. ამასთან, თბილისის მერის მოადგილის, მაია ბითაძის თქმით, 2019 წლის პირველი ოქტომბრიდან ტაქსის მანქანებზე დაწესებული რეგულაციები გავრცელდება ფერზე, ვიზუალსა და სხვადასხვა ტექნიკურ მახასიათებელზე.