საქართველოს პარლამენტის თავმჯდომარემ, რესპუბლიკური პარტიის წევრმა დავით უსუფაშვილმა პირველი არხის გადაცემა მთავარში რესპუბლიკური პარტიის მნიშვნელობასა და პოტენციალზე ისაუბრა:

"ჩვენ პურს ვერ ვაცხობთ, ეგ არ ვიცით, ჩვენ ვერ მოგვყავს კარგი მოსავალი, ვერ ვთოხნით კარგად, ანუ ამ თემებში არ ვვარგივართ, მაგრამ ჩვენ ვართ პოლიტიკური პარტია, რომელიც ემსახურება საქმეს, რასაც ჰქვია პოლიტიკის კეთება.

პოლიტიკურ ველზე სათამაშოდ, პრემიერლიგა რომ არსებობდეს და შედარებისთვის ფეხბურთის გუნდებში რომ გადავიდეთ, საფეხბურთო ჩემპიონატში მონაწილე გუნდებს შორის ჩვენ ვართ სერიოზული ძალა. არ ვართ ბატონო, ჩვენ მანჩესტერ იუნაიტედი, რომელიც ყოველ მეორე წელს ხდებოდა ჩემპიონი ბრიტანეთში, მაგრამ სამაგიეროდ ვართ ლივერპული, რომელიც სულ კარგ თამაშებს თამაშობდა და მუდმივად ყოჩაღად იყო".

დავით უსუფაშვილმა ყველა სხვა პარტიას წარმატება უსურვა და თამაშში მათ მნიშვნელობაზეც გაამახვილა ყურადღება: "აბა ლივერპული მარტო რომ იყოს ინგლისის ჩემპიონატში, ფეხბურთს კი არა ვერაფერს ვერ ითამაშებდა. ან მაგალითად, ერთი პურის მცხობელი რომ იყოს საქართველოში, ჩვენ იმ პურს საერთოდ ვერ შევჭამდით, ისეთი უხარისხო იქნებოდა. აი ამიტომაა აუცილებელი კონკურენცია და მრავალპარტიულობა".

უსუფაშვილის თქმით, ამომრჩეველი გრძელვადიან პერსპექტივაზე უნდა დაფიქრდეს და არჩევანი ისე გააკეთოს. პარლამენტის თავმჯდომარის მოსაზრებით, რესპუბლიკელებს პურის ცხობისა და თოხნისგან განსხვავებით, რაც კარგად გამოსდით, ესაა საერთაშორისო ასპარეზზე მუშაობა, კანონის წერა და კანონის კითხვა, კანონმორჩილება, კონსტიტუციურ სისტემაში ჩაჯდომა, გრძელვადიან ინტერესებზე მუშაობა, პარტნიორებთან ურთიერთობა,
პრინციპული კამათი.

"ამ საქმეების კეთება ჩვენ ვიცით ყველაზე კარგად თუ არა, არავისზე უარესად არა", - მიიჩნევს უსუფაშვილი.

რამდენიმე კვირის წინ ცნობილი გახდა, რომ რესპუბლიკური პaრტია 2016 წლის საპარლამენტო არჩევნებში დამოუკიდებლად, ქართულ ოცნებასთან კოალიციის გარეშე მიიღებს მონაწილეობას.